މޯލްޑިވްސް ނޭޝަނަލް ޕާޓީ (އެމްއެންޕީ) ގެ އިންޓެރިމް އެގްޒެކިއުޓިވް ކައުންސިލްގެ މަގާމުތަށް އިންތިހާބު ކުރުމަށް ބާއްވާ އިންތިހާބުގައި ބޭނުންކުރާނީ އިލެކްޓްރޯނިކް ވޯޓިން ސިސްޓަމެއް ކަމަށް އެ ޕާޓީން ބުނެފި އެވެ.
އެމްއެންޕީ އުފެއްދުމަށް ބާއްވާ ޖަލްސާ އަންނަ ހުކުރު ދުވަަހު ގިޔާސުއްދީން އިންޓަނޭޝަނަލް ސްކޫލުގައި ބާއްވަން މިހާރު ވަނީ ތާވަލުކޮށްފަ އެވެ. އަދި ހަމަ އެދުވަހު އެ ޕާޓީގެ އިންޓެރިމް ކައުންސިލްގެ މަގާމުތަަކަށް ބޭފުޅުން އިންތިހާބުކުރުމަށް ވޯޓު ލާނެ އެވެ.
އެމްއެންޕީން ބުނީ އިންތިހާބުގެ ވޯޓުލުމުގެ މަރުހަލާގައި ބޭނުންކުރާނީ ކިއޮސްކް އިލެކްޓްރޯނިކް ވޯޓިން ސިސްޓަމެއް ކަމަށެވެ.
އިންތިހާބުގައި ވާދަކުރުމުގެ މުއްދަތު ހަމަވެފައިވާ އިރު ޖުމަލް 54 ބޭފުޅަކު އެކި މަގާމުތަކަށް ކުރިމަތިލައްވައިފައި ވެއެވެ.
އޭގެ ތެރެއިން އެމްއެންޕީގެ ރައީސްކަމަށް ކުރިމަތިލެއްވީ އެ ޕާޓީ އުފެއްދުމަށްޓަކައި އިސްވެ އުޅުއްވި ދަނގަތީ ދާއިރާގެ މެމްބަރު މުހައްމަދު ނާޒިމް އެކަންޏެވެ. އެހެންވެ ނާޒިމް ވަނީ އޮޓަމެޓިކުން ރައީސްކަމަށް ހޮވިވަޑައިގެންފަ އެވެ.
ރައީސްގެ އިތުރުން ރާއްޖޭގެ ފަސް ސަރަަހައްދެއް ތަމްސީލް ކުރާ ގޮތަށް ފަސް ނައިބު ރައީސުން އަދި އަންހެން މެމްބަރުންނަށް ހާއްސަ ނާއިބު ރައީސްއެއް ހޮވާނެ އެވެ.
އޭގެ ތެރެއިން ހަތަރު ދާއިރާތަކަށް އެންމެ ބޭފުޅަކު ކުރިމަތިލައްވާފައި ވާތީ ނާއިބު ރައީސުންގެ ގޮތުގައި ހަތަރު ބޭފުޅުން މިހާރުވެސް ވަނީ ހޮވިވަޑައިގެންފަ އެވެ. އޭގެ ތެރޭގައި ތިމަރަފުށީ ދާއިރާގެ މެމްބަރު އަބްދުﷲ ރިޔާޒާއި ވިލިމާލެ ދާއިރާގެ މެމްބަރު އަހުމަދު އުޝާމް ހިމެނިލައްވަ އެވެ.
އިންތިހާބު ކުރާ އިތުރު މަގާމުތައް
- އަންހެނުންގެ ވިންގް ލީޑަރު
- ޒުވާނުންގެ ވިންގް ލީޑަރު
- ކައުންސިލް މެމްބަރުންގެ ގޮތުގައި 21 މެމްބަރުން
