ރައްޔިތުންގެ މަޖިލީހުން ފާސްކުރި ހަކަތައިގެ ބިލު ރައީސް އިބްރާހިމް މުހައްމަދު ސޯލިހު މިއަދު ތަސްދީގުކުރަައްވައިފި އެވެ.
މި ބިލު ތަސްދީގުކޮށް ބިލު ވަނީ ސަރުކާރުގެ ގެޒެޓުގައި ވެސް ޝާއިއުކޮށްފަ އެވެ. އެއާއެކު މިއަދުން ފެށިގެން މި ގާނޫނަށް އަމަލުކުރަން ފަށޭނެ އެވެ.
ސަރުކާރުން ސްޕޮންސާކޮށްގެން އެ ބިލު މަޖިލީހަށް ހުށަހެޅުއްވީ އިނގުރައިދޫ ދާއިރާގެ މެމްބަރު ހަސަން މުހައްމަދު އެވެ. އަދި އެ ބިލު މަޖިލީހުން ފާސްކުރީ މިދިޔަ މަހުގެ 21 ވަނަ ދުވަހު އެވެ.
މި ގާނޫނު ތަސްދީގުކުރުމާ އެކު ކުރިން އަމަލުކުރަމުން އައި އާންމު ބޭނުންތަކުގެ ހިދުމަތްތަކުގެ ގާނޫނު ނަންބަރު 96/4 އުވޭނެ އެވެ. އަދި ހަކަތައިގެ ގާނޫނުގެ ދަށުން ހަދަންޖެހޭ ގަވާއިދުތައް އަހަރު ދުވަހުގެ ތެރޭގައި ހަދައި އާންމުކޮށް ޝާއިއުކުރަން ޖެހޭނެ އެވެ.
ހަކަތައިގެ ގާނޫނުގެ ބެނުމަކީ ރާއްޖޭގައި ހަކަތަ އުފެއްދުމާއި، ހަކަތަ ބޭނުންކުރުމާއި، ހަކަތަ ފޯރުކޮށްދިނުމާގުޅޭ އުސޫލުތައް ކަނޑައަޅުން ކަމަށް އެ ގާނުނު ފާސްކުރަން ހުށަހެޅި ބިލުގައި ބުނެފައި ވެއެވެ. ހަމަ އެހެންމެ ހަކަތައިގެ ހިދުމަތް ބޭނުންކުރާ ފަރާތްތަކުގެ ހައްގުތަކާއި، އާންމު ބޭނުންތަކެއްގެ ހިދުމަތެއްގެ ގޮތުގައި ހަކަތަ ފޯރުކޮށްދޭ ފަރާތްތަކުގެ ހައްގުތަކާއި ޒިންމާތައް ކަނޑައަޅައި، އެފަދަ ފަރާތްތަކުން ފޯރުކޮށްދޭ ހިދުމަތުގެ ފެންވަރު ހިފަހައްޓައި، ހިދުމަތްހޯދާ ފަރާތްތަކަށް އެކަށީގެންވާ އަގެއްގައި ހިދުމަތް ފޯރުކޮށްދިނުމަށްޓަކައި ކަމާބެހޭ ފަރާތްތަކުގެ މަސްއޫލިއްޔަތުތައް ބަޔާންކޮށްފައިވެއެވެ.
މި ގާނޫނު ތަސްދީގުކުރުމާ އެކު ކައުންސިލްތަކުގެ އިހްތިސޯސްގެ ދަށުން ދޭ ކަރަންޓު، ޔުޓިލިޓީ އޮތޯރިޓީން ކަނޑައަޅާ އަގަށްވުރެ ހެޔޮކޮށް ދެވޭނެ އެވެ. އަދި އަގުގެ ފަރަގު ހިދުމަތް ފޯރުކޮށްދޭ ފަރާތަށް ދައްކާނެ އިންތިޒާމު ކައުންސިލުން ހަމަޖައްސަން ވާނެ ކަމަށާއި، އެގޮތަށް އަގުގެ ފަރަގު ދައްކަން ޖެހޭ ހާލަތުގައި ކައުންސިލަށް ދައުލަތުގެ އަހަރީ ބަޖެޓުގެ ގޮތުގައި ކަނޑައަޅާފައިވާ ފައިސާ ބޭނުން ނުކުރެވޭނެ ކަމަށް ބުނެފައި ވެއެވެ.