ގްރީން ޓެކްސް ބޮޑުކުރަން ޓޫރިޒަމާ ބެހޭ ގާނޫނަށް ގެނައި އިސްލާހުގެ ބިލް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.
ސަރުކާރުން ސްޕޮންސަކޮށްގެން ރައްޔިތުންގެ މަޖިލީހަށް މި މި އިސްލާހު ހުށަހެޅުއްވީ މައްޗަންގޮޅި ދެކުނު ދާއިރާގެ މެންބަރު މުސްތަފާ ހުސައިން އެވެ.
މަޖިލީހުން މިދިޔަ އޮކްޓޫބަރު 31 ވަނަ ދުވަހު މި އިސްލާހު ފާސްކުރީ 71 މެންބަރުން ތާއީދު ވޯޓާ އެކު އެވެ. މިއިސްލާހު ފާސްކުރުމާ ދެކޮޅަށް އެ ދުވަހުގެ ޖަލްސާގައި އަށް މެންބަރުން ވޯޓު ދެއްވި އެވެ.
މިއިސްލާހުގެ ދަށުން ފަތުރުވެރިކަމާބެހޭ ކަންކަމަށް ކޮންމެ މާލީ އަހަރަކު ދޫކުރާނެ ރަށްރަށާއި ބިންބިމާއި ފަޅުތަކުގެ އަދަދާއި، އެތަންތަނާ ބެހޭ މައުލޫމާތު ހިމެނޭ ލިސްޓެއް، ރައީސުލްޖުމްހޫރިއްޔާގެ މަޝްވަރާއާއެކު ޓޫރިޒަމާ ބެހޭ މިނިސްޓްރީން އެކުލަވާލައި އާންމުކުރަންޖެހެ އެވެ. އަދި ރައީސުލްޖުމްހޫރިއްޔާގެ ހުއްދައާއެކު އެ ލިސްޓަށް އުނިއިތުރު ގެނައުމުގެ އިހްތިޔާރު މިނިސްޓްރީއަށް ލިބިގެންވެ އެވެ.
ރާއްޖޭގައި ހިންގާ ޓޫރިސްޓް ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ރިޒޯޓް ހޮޓާތަކާއި، ހޮޓާތަކާއި، ޓޫރިސްޓް ގެސްޓްހައުސްތަކާއި، ޓޫރިސްޓް އުޅަނދުތަކާއި، އެނޫންވެސް އެފަދަ ތަންތަނުގައި ތިބޭ ޓޫރިސްޓުންގެ އަތުން، އެއިން ކޮންމެ މީހަކު އެތަނެއްގައި ނުވަތަ އުޅަނދެއްގައި ހޭދަކުރާ ކޮންމެ ދުވަހަކަށް، ގްރީން ޓެކްސްގެ ގޮތުގައި ދައުލަތަށް ނަގާ ޓެކްސް ބޮޑުކުރަންވެސް މިއިސްލާހުގައި ހިމަނާފައިވެ އެވެ.
މީހުން ދިރިއުޅޭ ރަށްރަށުގައި ހިންގާ ހޮޓާތަކާއި ޓޫރިސްޓް ގެސްޓްހައުސްތަކުގެ ތެރެއިން 50 ކޮޓަރި ނުވަތަ އެއަށްވުރެ މަދު އަދަދެއްގެ ކޮޓަރި ރަޖިސްޓަރީ ކޮށްފައިވާ ތަންތަނުގައި ތިބޭ ޓޫރިސްޓުންގެ އަތުން، އެއިން ކޮންމެ މީހަކު އެ ތަނެއްގައި ހޭދަކުރާ ކޮންމެ ދުވަހަކަށް ގްރީން ޓެކްސްގެ ގޮތުގައި މިހާރު ނަގަމުން ދަނީ ތިން ޑޮލަރެވެ. ނަމަވެސް ރައީސް މުއިއްޒު މިއަދު ތަސްދީގު ކުރެއްވި އިސްލާހަށް އަމަލުކުރަން ފެށުމާ އެކު އެއަދަދު ހަ ޑޮލަރަށް ބޮޑުކުރާނެ އެވެ.
ރާއްޖޭގައި ހިންގާ ޓޫރިސްޓް ރިޒޯޓުތަކާއި އިންޓަގްރޭޓަޑް ޓޫރިސްޓް ރިޒޯޓުތަކާއި ރިޒޯޓު ހޮޓާތަކާއި ހޮޓާތަކާއި ޓޫރިސްޓް ގެސްޓްހައުސްތަކާއި ޓޫރިސްޓް އުޅަނދުތަކުގައި ޓޫރިސްޓަކު ހޭދަކުރާ ކޮންމެ ދުވަހަކަށް ގްރީން ޓެކްސްގެ ގޮތުގައި މިހާރު ނަގަމުން ދަނީ ހަ ޑޮލަރެވެ. ނަމަވެސް ރައީސް މުއިއްޒު މިއަދު ތަސްދީގު ކުރެއްވި އިސްލާހަށް އަމަލުކުރަން ފެށުމާ އެކު އެއަދަދު 12 ޑޮލަރަށް ބޮޑުކުރާނެ އެވެ.
ގްރީން ޓެކްސް ބޮޑު ކުރުމުގެ އިސްލާހު ތަސްދީގު ކުރެއްވުމާ ގުޅިގެން ގުޅިގެން ޓޫރިޒަމާ ބެހޭ ގާނޫނުގެ ދަށުން އެކުލަވާލާފައިވާ ގަވާއިދުތަކަށް ގެންނަންޖެހޭ އިސްލާހުތައް މިއަދުން ފެށިގެން ކުރިއަށް އޮތް 30 ދުވަހުގެ ތެރޭގައި އެކުލަވާލައި، ސަރުކާރުގެ ގެޒެޓުގައި ޝާއިއުކުރަން ޖެހެ އެވެ. މިއަދު ތަސްދީގު ކުރެއްވި އިސްލާހުގައިވާ ގޮތުން ގްރީން ޓެކްސްގެ އާ ބަދަލާ އެއްގޮތަށް ގްރީން ޓެކްސް ނަގަން ފަށާނީ އަންނަ އަހަރުގެ ޖެނުއަރީ މަހުން ފެށިގެންނެވެ.