ތިން ގައުމަކުން ރާއްޖެއަށް ކަނޑައެޅި އާ ސަފީރުން، ސަފީރުކަމުގެ ފަތްކޮޅު ރައީސް އިބްރާހިމް މުހައްމަދު ސޯލިހަށް އަރުއްވައިފި އެވެ.
ފަތްކޮޅު އަރުއްވާފައި ވަނީ ނައިޖީރިއާ، ނިއުޒިލޭންޑް އަދި ފިލިޕީންސް ސަރުކާރުން ރާއްޖެއަށް ކަނޑައެޅި އާ ސަފީރުންނެވެ. ސަފީރުކަމުގެ ފަތްކޮޅު އެރުއްވީ ނައިޖީރިއާގެ އާ ސަފީރު އަބިއޮޔޭ މުހައްމަދު ބެއްލޯ، ނިއުޒިލޭންޑްގެ އާ ސަފީރު މައިކަލް އެޑްވަރޑް އެޕަލްޓަން އަދި ފިލިޕިންސްގެ އާ ސަފީރު އެލަން އެލް ޑެނިއެގާ އެވެ.
ރައީސް އޮފީހުގައި މިއަދު ބޭއްވި މި ރަސްމިއްޔާތުގައި ތިން ބޭފުޅުންނާ ވާހަކަދައްކަވައި އެ ގައުމުތަކާއި އެކީ ގުޅުން ބަދަހިކުރުމާ ގުޅޭ ގޮތުން ރައީސް ވަނީ މަޝްވަރާކުރައްވާފަ އެވެ.
އެގޮތުން ފިލިޕިންސްގެ އާ ސަފީރު ވަނީ ރާއްޖޭގައި ދިރިއުޅޭ އެ ގައުމުގެ ރައްޔިތުންނަށް ރާއްޖެއަށް ބަހައްޓާ ގާތްކަން ފާހަގަކުރައްވައި ޝުކުރު އަދާކުރައްވާފަ އެވެ.
ނިއުޒިލޭންޑްގެ ސަފީރާއި އެކީ މަތީ ތަޢުލީމުގެ ފުރުސަތުތައް އިތުރުކުރުމާއި، ޓެރަރިޒަމާއި ހައްދުފަހަނައަޅައި ދިއުމާއި، ސުލްހައާއި ސަލާމަތާއި ރައްކާތެރިކަމާއި، އަދި ދެ ގައުމުގެ މަތީ ފަންތީގެ ފަރާތްތަކުގެ މެދުގައި ގުޅުން ބަދަހިކުރެއްވުމާ ގުޅޭގޮތުން ރައީސް ވަނީ މަޝްވަރާކުރައްވާފަ އެވެ.