އެންޓި ކޮރަޕްޝަން ކޮމިޝަން (އޭސީސީ) މެންބަރު އިބްރާހީމް ޝަކީލް އެ ކޮމިޝަނުން އިސްތިއުފާ ދެއްވުމަށް ނިންމަވައިފި އެވެ.
ޝަކީލް އިސްތިއުފާ ދެއްވުމަށް ނިންމަވާފައި މިވަނީ އޭސީސީގެ މެންބަރުން ވަކިކުރުމަށް ވޯޓަށް އެހުމަށް މާދަމާ ހެނދުނު 10:00 ޖަހާއިރު ދައުރުން ބޭރުގައި މަޖިލީހުގެ ޖަލްސާއެއް ބާއްވަން ނިންމާ، މަޖިލީހުގެ މެންބަރުންނަށް އެކަން އަންގާފައި ވަނިކޮށެވެ.
އަވަސް އަށް މިއަދު މައުލޫމާތު ދެއްވަމުން ޝަކީލް ވިދާޅުވީ އޭސީސީގައި މެންބަރެއްގެ ގޮތުގައި އޭނާ އަށް ވަރަށް ގިނަ އަދި ވަރަށް ރަނގަޅު މަސައްކަތްތަކެއް ކުރެއްވުނު ކަމަށް ގަބޫލުކުރައްވާ ކަމަށެވެ. ނަމަވެސް ރައްޔިތުންގެ މަޖިލީހުގެ މެންބަރުން އޭސީސީގެ މެންބަރުންނަށް އިތުބާރު ނުކުރައްވާނަމަ އެ މަގާމުގައި ހުންނެވުމުގެ ބޭނުމެއް ކަމަށެވެ.
ޝަކީލް ވިދާޅުވީ އޭނާގެ އިސްތިއުފާ ސިޓީ މިއަދު ރައީސް އޮފީހަށް ނުފޮނުއްވުނީ ރަސްމީ ގަޑި ޖެހުނު ފަހުން އިސްތިއުފާގެ ސިޓީ ފޮނުވަންޖެހުމުން ކަމަށެވެ. ނަމަވެސް މާދަމާ ރަސްމީ ގަޑީގައި އިސްތިއުފާގެ ސިޓީ ރައީސް އޮފީހަށް ފޮނުއްވާނެ ކަމަށެވެ.
"އަޅުގަނޑު ދެކޭ ގޮތުގައި މަޖިލީހުން ވެސް ރައްޔިތުންނަށް އެންމެ ރަނގަޅު ގޮތް ކަމަށް ބަލާފަ ކަންނޭނގޭ އޭސީސީގެ މެންބަރުން ވަކިކުރަން ނިންމާނީ. އެކަމަކު އަޅުގަނޑު ހަމަގައިމުވެސް އޭސީސީގައި ކުރެވުނު މަސައްކަތާ މެދު ހިތްހަމަޖެހޭ،" ޝަކީލް ވިދާޅުވި އެވެ.
އޭސީސީގައި މިވަގުތު ތިއްބެވި ހަތަރު މެންބަރުންގެ ތެރެއިން އޭސީސީގެ މެންބަރު ކަމަށް އެންމެ ފަހުން އައްޔަންކުރެއްވި ބޭފުޅަކީ ޝަކީލް އެވެ. އޭނާ އެ މަގާމަށް އައްޔަންކުރައްވާ މަގާމުގެ ފަތްކޮޅު ހަވާލުކުރެއްވީ އޮގަސްޓް 25، 2019 ގައެވެ.
އޭސީސީގެ މެންބަރު ކަމުން ޝަކީލް އިސްތިއުފާ ދެއްވި ނަމަވެސް އޭސީސީގެ މެންބަރުންގެ ގޮތުގައި ތިއްބެވި ކޮމިޝަންގެ ރައީސް މަރިޔަމް ޝިއުނާ އާއި ނައިބް ރައީސް ފާތިމަތު އަނޫލާ އާއި މެންބަރު އައިޝަތު އަބްދުﷲ ނިންމެވި ގޮތެއް އެބޭފުޅުން ހާމަކުރައްވާފައެއް ނުވެ އެވެ.