އިންޑިޔާގެ އުއްތަރު ޕްރަދޭޝްގެ އިންތިޚާބުތަކުގެ ތެރެއިން ފުރަތަމަ ބުރުގައި ވާދަކުރާ ކެންޑިޑޭޓުން ނޮމިނޭޓް ކުރުމުގެ މަސައްކަތް މިދިޔަ ހަފުތާގައި ވަނީ ފަށާފަ އެވެ. މި އިންތިޚާބުތަކުގައި ވާދަކުރާ އެންމެ ކެންޑިޑޭޓެއް ފިޔަވައި އެހެން ހުރިހާ ކެންޑިޑޭޓުން ވެސް އިންތިޚާބު ކާމިޔާބުކުރުމުގެ އަޒުމުގައި ވަރަށް ގަދަޔަށް ކެމްޕޭން ކުރަން ވަނީ ފަށާފަ އެވެ. ނަމަވެސް އެއް ކެންޑިޑޭޓަކަށް އިންތިޚާބު ކާމިޔާބުކުރުން އެހާ މުހިއްމެއް ނޫނެވެ. ސަބަބަކީ އޭނާ އިންތިޚާބުގައި ބައިވެރި ވަނީ ބަލިވާން ކަމަށް ވާތީ އެވެ.
ހަސަނޫރާމް އަމްބޭދްކާރީ މިފަހަރުވެސް މިނިވަން ކެންޑިޑޭޓެއްގެ ގޮތުގައި އުއްތަރު ޕްރަދޭޝްގެ އާގްރާގެ ކެރާގަރް އެސެމްބްލީއަށް ކުރިމަތިލާން ނޮމިނޭޝަންސް ކަރުދާސްތައް ވަނީ ހުށަހަޅާފަ އެވެ. މިއީ އޭނާ އިންތިޚާބުތަކުގައި ބައިވެރިވާ 94 ވަނަ ފަހަރެވެ. ހުރިހާ ފަހަރަކު ވެސް އޭނާއަށް ބޮޑު ނާކާމިޔާބެއް ވެފައި ވެއެވެ. މިހާރު އަމްބޭދްކާރީ މަސައްކަތް މި ކުރަނީ 100 ފަހަރަށް އިންތިޚާބަކުން ނާކާމިޔާބުވީ މީހެއްގެ ރެކޯޑް ގާއިމް ކުރާށެވެ.
ދަނޑެއްގައި މަސައްކަތު މީހެއްގެ ގޮތުގައި އުޅޭ އެމްބޭދްކާރީ ބުނާ ގޮތުގައި އޭނާ އަކީ އެއްވެސް މަދަރުސާއަކުން ކިޔެވި މީހެއް ނޫނެވެ. ނަމަވެސް އުރުދޫ، ހިންދީ އަދި އިނގިރޭސި ބަހުން ލިޔެ ކިޔަން އެނގޭ ކަމަށް އޭނާ ބުނެ އެވެ.
އެމްބޭދްކަރް ވަނީ އިންޑިޔާގެ ރައީސްކަމަށް ކުރިމަތިލާން ވެސް 1988ގައި ފޯމް ހުށަހަޅާފަ އެވެ. ނަމަވެސް އެފަހަރު އޭނާގެ ނޮމިނޭޝަން ގަބޫލެއް ނުކުރެ އެވެ.
އިންޑިޔާގެ ނިއުސް އެޖެންސީއަކަށް ދިން އިންޓަވިއު އެއްގައި އަމްބޭދްކަރް ބުނީ އޭނާ އިންތިޚާބުތަކުގައި ބައިވެރިވަނީ އެ އިންތިޚާބަކުން ބަލިވާ ހިތުންނެވެ. އެއީ 100 ފަހަރު އިލެކްޝަނެއްގައި ބައިވެރިވި މީހާގެ ރެކޯޑެއް ހަދާށެވެ. އެހެންވެ އޭނާއަށް ބައިވެރިވެވޭނެހެން ހީވާ ހުރިހާ އިންތިޚާބަކަށް ނޮމިނޭޓް ކަރުދާސްތައް ހުށަހެޅުމަކީ އަމްބޭދްކަރް ކުރަމުންދާ ކަމެކެވެ.
އިންތިޚާބުތަކަށް ކުރިމަތިލާފައި އަމްބޭދްކަރް މަޑަކުން ނުހުރެ އެވެ. އަންހެނުންނާއި އެހެން ބައެއް އެކުވެރިންނާއެކު ގޭގެއަށް ކެމްޕޭނަށް ވެސް ދެއެވެ. އަދި އޭނާގެ ޚިޔާލުތައް އެމީހުންނަށް ކިޔައިދޭން މަސައްކަތް ކުރެ އެވެ.