ކޮވިޑް-19 އަށް ޓެސްޓް ކުރަން ސާމްޕަލް ނަގާ ސެންޓަރެއް ހެންވޭރު ދަނޑުގައި ހަދައިފި އެވެ.
އެޗްޕީއޭއިން މިއަދު ބުނީ އެ ސެންޓަރުން ހަވީރު ތިނަކުން ހަޔަކަށް ސާމްޕަލް ނަގައިދޭނެ ކަމަށެވެ.
މިވަގުތު މާލެ ސަރަހައްދުގައި ސާމްޕަލް ނަގައިދެނީ ތިން ސެންޓަރަކުންނެވެ. މާލެއިން ސިފައިންގެ ސެނެހިޔާ އަދި ވިލިމާލެ އިން ވިލިމާލެ ފްލޫ ކްލިނިކް އަދި ހުޅުމާލެއިން ހުޅުމާލެ ހޮސްޕިޓަލުންނެވެ. ސާމްޕަލް ނަގައިދޭ ވަގުތުތަކުގައި ސެނެހިޔާ ފްލޫ ކްލިނިކް ސަރަހައްދުގައި އަބަދުވެސް ދިގު ކިއުތަކެއް އޮވެއެވެ.
މާލެއިން ރަށްރަށަށް ދާއިރު ކޮވިޑް ޓެސްޓް ހަދަން މަޖުބޫރު ކުރުމުން އެތައް ބަޔަކު ސާމްޕަލް ދޭން ކިއުތަކުގައި ގިނައިރު ތިބެއެވެ. މި ސެންޓަރުތަކަށް ބާރު ބޮޑުވަނީ ހިލޭ ޓެސްޓް ކޮށްދޭތީ އެވެ.
ސިއްހީ ހިދުމަތްދޭ އަމިއްލަ ތަންތަނުން ކޮވިޑަށް ޓެސްޓް ކޮށްދެނީ 500 އިން މަތީގެ އަގުތަކެއްގައެވެ.
