ރާއްޖެއިން ކޮވިޑް-19 ޖެހުނު މީހުންގެ ތެރެއިން 140،376 މީހަކު އެ ބަލީން ފަސޭހަ ވެއްޖެ އެވެ.
މިހާތަނަށް ކޮވިޑަށް ޕޮޒިޓިވްވެފައިވަނީ 156،903 މީހުންނެވެ. އޭގެ ތެރެއިން ބަލިން ފަސޭހަނުވެ ތިބީ 16،227 މީހެކެވެ. މި ވަގުތު އެޑްމިޓްކޮށްގެން ފަރުވާ ދެމުންދަނީ 49 މީހަކަށެވެ. ހަތް މީހަކަށް ފަރުވާ ދެނީ އައިސީޔޫގައެވެ.
ކޮވިޑްގެ ބަލިމަޑުކަމުގައި ނުރައްކާތެރި ފަސް ރާޅެއްގެ ތަޖުރިބާ ދިވެހިން ކޮށްފައިވެއެވެ. އޭޕްރީލް ފަހުކޮޅުން ފެށިގެން ޖޫންގެ ކުރީ ހަފްތާއާ ހަމައަށް ބަލީގެ ހާލަތު ވަރަށް ބޮޑަށް ގޯސްވިއެވެ. ބަލި ޖެހުނު މީހުންގެ 60 އިންސައްތަ އަކީ އެ މުއްދަތުގަައި ބަލި ޖެހުނު މީހުންނެވެ. އަދި މިހާތަނަށް ކޮވިޑްގައި މަރުވި 287 މީހުންގެ ތެރެއިން 100 އަށްވުރެ ގިނަ މީހުން މަރުވީވެސް އެ މުއްދަތުގައެވެ.
މެއި މަހު އެކަނިވެސް 88 މީހަކު މަރުވިއެވެ. 35،000 ވުރެ ގިނަ މީހުންނަށް ބަލި ޖެހުނެވެ. މެއި މަހުގެ އެންމެ ދުވަހެއް ފިޔަވައި އެހެން ހުރިހާ ދުވަހަކު ކޮވިޑްގައި މީހުން މަރުވިއެވެ. ސައުވީސް ގަޑިއިރުތެރޭ 13 މީހަކު މަރުވި ދުވަހެއްވެސް ދިޔައެވެ.
ކޮވިޑްގެ ހާލަތު މިދިޔަ މަހެއްހާ ދުވަހުވެސް ވަރަށް ބޮޑަށް ގޯހެވެ. މި ފަހުން ކޮންމެ ދުވަހަކު ޕޮޒިޓިވް ނަންބަރު ހުންނަނީ 1،000 އިން މަތީގައެވެ. 2،000 އިން މަތީގައި ނަންބަރު ހުރި އެތައް ދުވަހެއް ދުވަހެއް ދިޔައެވެ. 27 ދުވަހަށް ފަހު ޕޮޒިޓިވް ނަންބަރު ފުރަތަމަަ ފަހަރަށް ހާހުން ދަަށަށް ވަނީ ޖެހިލާފައެވެ.