އެމްޑީޕީގެ ޗެއާޕާސަންގެ މަގާމަށް ވާދަކުރައްވަމުން ގެންދަވާ އިމްތިޔާޒު ފަހްމީ އަށް އެ ޕާޓީގެ އެންމެ ފަހުގެ ޗެއާޕާސަން ހަސަން ލަތީފް ތާއީދުކުރައްވައިފި އެވެ.
ހަސަން ލަތީފަކީ އިމްތިޔާޒާ އެކު ޗެއާޕާސަންގެ މަގާމަށް ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއީލްގެ ޅިޔަނެކެވެ.
އިމްތިޔާޒަށް ވަރަށް ބޮޑަށް ތައުރީފް ކުރައްވާ ހަސަން މިރޭ ވިދާޅުވީ އިމްތިޔާޒަކީ އެމްޑީޕީގެ ހަ ފަރާތް ދެނެވަޑައިގަންނަވާ ބޭފުޅެއް ކަމަށެވެ.
އިމްތިޔާޒަކީ އެމްޑީޕީގެ އިތުބާރު ހިފެހެއްޓުމަށާއި, އެމްްޑީޕީ އަށް ހައްގު މިންވަރު ހޯދައިދިނުމަށް މަސައްކަތް ކުރެއްވުމުގެ ލާމަސީލު މިސާލެއް ކަމުގައިވެސް ހަސަން ވިދާޅުވި އެވެ.
"ޕާޓީގެ ޗެއާޕާސަން ކަމަށް އަޅުގަނޑުގެ ތާއީދު އިންތިއަށް،" ހަސަން ވިދާޅުވި އެވެ.
އެމްޑީޕީގެ ތަރުޖަމާންގެ މަގާމުން އިސްތިއުފާ ދެއްވުމަށްފަހު އިމްތިޔާޒު މިއަދު ވަނީ ޗެއާޕާސަން ހޮވުމަށް ބާއްވާ އިންތިހާބުގައި ވާދަކުރެއްވުމަށް އެމްޑީޕީ އޮފީހަށް ފޯމް ހުށަހަޅުއްވާފަ އެވެ. ފައްޔާޒު އަދި ފޯމް ހުށަހަޅުއްވާފައެއް ނުވެ އެވެ.
އިމްތިޔާޒުގެ ކެމްޕޭން މެނޭޖަރަކަށް ހަމަޖައްސަވާފައިވަނީ ރައްޔިތުންގެ މަޖިލީހުގެ ނައިބް ރައީސް އީވާ އަބްދުﷲގެ ފިރިކަލުން އަހްމަދު ޝާހިދު (ސާބެ) އެވެ. ޗެއާޕާސަންގެ މަގާމަށް ވާދަކުރައްވާ ބޭފުޅުންނަށް ތާއީދު އޮތްކަން އަންގައިދިނުމުގެ ގޮތުން ސޮއި ކުރަންޖެހޭ އިމްތިޔާޒުގެ ފޯމްތަކުގައި ރައީސް ނަޝީދުގެ މަންމައާއި ބައްޕަ އަދި އާއިލީ ބޭފުޅުން ވަނީ ސޮއި ކުރައްވާފަ އެވެ.
މައުލޫމާތު ލިބޭ ގޮތުގައި އިމްތިޔާޒު ވާދަކުރައްވަނީ ރައީސް މުހައްމަދު ނަޝީދުގެ އެދިވަޑައިގަތުމަކަށެވެ. އަދި ފައްޔާޒު ވާދަކުރައްވަނީ ރައީސް އިބްރާހީމް މުހައްމަދު ސޯލިހްގެ އެދިވަޑައިގަތުމަކަށެވެ.
އެމްޑީޕީގެ ޗެއާޕާސން ހޮވުމުގެ އިންތިހާބު ފޯރިގަދަވެ އިންތިއާއި ފައްޔާޒުގެ ސަޕޯޓަރުން ގެންދަނީ ސޯޝަލް މީޑިއާގައި އެއް ޓީމުން އަނެއް ޓީމަށް ރައްދު ދެމުންނެވެ.
އެމްޑީޕީގެ ޗެއާޕާސަންގެ އިތުރުން ޒުވާނުންގެ ޔޫތު ވިންގު އަދި އަންހެނުންގެ ރޫހުގެ އިންތިހާބަށް ކުރިމަތިމަތިލުމުގެ ފުރުސަތު ހުޅުވާލީ މިދިޔަ ހޮނިހިރު ދުވަހު އެވެ.
މި މަގާމުތަކަށް ކުރިމަތިލުމުގެ ސުން ގަޑިއަކީ މިމަހުގެ 19 ވަނަ ދުވަހުގެ ހަވީރު 4:00 އެވެ. މަގާމުތަކަށް ކުރިމަތިލާ ކެންޑިޑޭޓުންގެ ނަންތައް މިމަހުގެ 22 ވަނަ ދުވަހު އިއުލާނު ކުރުމަށް ވަނީ ނިންމާފަ އެވެ. އަދި އިންތިހާބު ބޭއްވުމަށް ހަމަޖައްސާފައިވަނީ އޭޕްރީލް 16 ވަނަ ދުވަހު އެވެ.
އެންމެ ފަހުން އެމްޑީޕީގެ ޗެއާޕާސަންގެ މަގާމުގައި ހުންނެވީ ހަސަން ލަތީފް އެވެ. އޭނާ އެ މަގާމާ ހަވާލުވެވަޑައިގަތީ މީގެ ފަސް އަހަރު ކުރިން ފެބްރުއަރީ 12، 2017 ގައެވެ.
އެމްޑީޕީގެ ޗެއާޕާސަންގެ މަގާމު ފަސް އަހަރު ވަންދެން ފުރުއްވި ހަމައެކަނި ބޭފުޅަކީ ވެސް ހަސަން ލަތީފް އެެވެ.