ރައީސް އަބްދުﷲ ޔާމީން ދަތުރުފުޅުކުރެއްވި ފިނިފެންމާ ލޯންޗުކޮޅުގައި ބޮން ގޮއްވާލި ހާދިސާއާ ގުޅިގެން ކުރީގެ ނައިބު ރައީސް އަހުމަދު އަދީބުގެ މައްޗަށް ކުރެވޭ ތުހުމަތުތަކުން އޭނާ ވީއްލިފައިވާ ކަމަށް އަދީބުގެ ގާނޫނީ ވަކީލުން ވިދާޅުވެއްޖެ އެވެ.
އަދީބުގެ ވަކީލުންގެ ފަރާތުން މިއަދު ނެރުނު ނޫސްބަޔާނެއްގައި ބުނީ، ރިޔާސީ ލޯންޗުކޮޅުގެ ހާދިސާއާ ގުޅިގެން އަދީބުގެ މައްޗަށް ދައުލަތުން ކުރި ތުހުމަތު ތަކަކީ އެއްވެސް ހަގީގަތެއް އެކުލެވޭ ވާހަކަތަކެއް ނޫންކަން މިހާރު ސާބިތުވެފައިވާ ކަމަށެވެ. މިހާތަނަށް އަދީބަށް ކުރަމުންއައި ހުރިހާ ތުހުމަތުތަކަކީ ސިޔާސީ ހަސަދަވެރިކަމެއްގެ ސަބަބުން ކުރަމުން އައި ތުހުމަތު ތަކެއް ކަމަށާއި، ލޯންޗުކޮޅުގައި އެއްޗެއް ގޮއްވާލިކަމަށް ކުރެވޭ ތުހުމަތުން އަދީބު ވީއްލި، އެބަންދުން އޭނާ ދޫކޮށްލާފައިވާކަން ފުލުހުން ޔަގީންކޮށްދީފައިވާ ކަމަށް ބަޔާނުގައި ބުންޏެވެ.
"ފުލުހުން މައުލޫމާތު ދެއްވި ގޮތުގައި އަހުމަދު އަދީބުގެ މައްޗަށް މިހާރު ތުހުމަތު ކުރެވެނީ، ހަމައެކަނި އެމްއެމްޕީއާރުސީގެ މައްސަލައެކެވެ." ހުސައިން ޝަމީމް އިސްކޮށް ހުންނަވާ އަދީބުގެ ވަކީލުންގެ ޓީމުން ނެރުނު ބަޔާނުގައިވެ އެވެ.
ފުލުހުންގެ ހައްޔަރުގައި ދޫނިދޫގައި ހުރި އަދީބުގެ މައްޗަށް މިހާރު ކުރެވޭ ހަމައެކަނި ތުހުމަތަކީ އެމްއެމްޕީއާރްސީގެ މައްސަލައިގައި ކުރެވޭ ތުހުމަތުތަކެއް ކަމަށް އަދީބުގެ ވަކީލުން ބުނެފައިވެ އެވެ. އެހެންކަމުން "ގައުމަށް އެންމެ ބޮޑު ހިޔާނާތް" ވި ކަމަށް ކުރެވޭ ތުހުމަތަކީ މިހާރު އަދީބާ އެއްވެސް ގުޅުމެއް އޮތް ކަމެއް ނޫން ކަމަށް ވެސް އެ ބަޔާނުގައި ބުނެފައިވެ އެވެ.
އެމްއެމްޕީއާރްސީގެ މައްސަލައިގައި އަދީބުގެ މައްޗަށް ދައުވާ ކުރަނީ، އަދީބް ޓޫރިޒަމް މިނިސްޓްރީ ހިންގުމާ ހަވާލުވެ ހުރެ، އެމްއެމްޕީއާރްސީ މެދުވެރިކޮށް ފުށިދިއްގަރު ފަޅު ބޭރު ބަޔަކަށް ކުއްޔަށް ދިން މައްސަލައިގައެވެ.
އެ މައްސަލަޔާ ގުޅިގެން ލޯޔަރު ޝަމީމް ވިދާޅުވީ، އެމްއެމްޕީއާރުސީއަކީ ދައުލަތުގެ ކުންފުންޏެއް ކަމަށާއި އެކުންފުނީގެ ޙަރަކާތްތަކަށް ޒިންމާވާނީ ކޮން ބައެއްކަން ކުންފުންޏާ ބެހޭ ގާނޫނުގައި ބަޔާންކޮށްފައި އޮންނާނެ ކަމަށެވެ. އަދި އަދީބު ސަރުކާރުގެ މަގާމުތަކުގައި ހުރި އިރު ނިންމި ނިންމުންތަކަކީ ގާނޫނާއި ގަވާއިދުތަކުގެ ތެރެއިން، ރައީސް އެކަމަށް ތާއީދުކުރައވައިގެން ނިންމި ނިންމުންތަކެއް ކަމަށް ވެސް ޝަމީމް ގެ ބަޔާނުގައި ވަނީ ބުނެފަ އެވެ.
އެމްއެމްޕީއާރުސީގެ ހިޔާނާތުގެ މައްސަލާގައި އަދީބުގެ މައްޗަށް ޝަރީއަތް ފަށާފައިވާއިރު، ފިތޯލަ ގެންގުޅުން ކަމަށް ބުނާ މައްސަލަ ކްރިމިނަލް ކޯޓަށްވަނީ ބަލައިގެންފައެވެ.
