ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީންގެ ގެ، ހ. ދޫވެހީގައި ދަމާފައި ހުރި "އިންޑިއާ އައުޓް" ބެނާ ނެގުމަށް ފުލުހުން އެ ގެއަށް ވަދެއްޖެ އެވެ.
ފުލުހުން ދޫވެއްސަށް ވަދެފައި މިވަނީ ރާއްޖޭގައި ތިބި އިންޑިއާ ސިފައިން ބާލަން ގޮވާލައި މާލޭގެ އިމާރާތްތަކުގައި ބެނާތައް ދަމަން ފެށުމުން އެކަމާ ހިތްޕުޅުހަމަޖިވަޑައި ނުގެން އެކަން ހުއްޓުވަން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފުލުހުންނަށް ގޮވާލާފައި ވަނިކޮށެވެ.
ފުލުހުން ދޫވެއްސަށް ވަދެފައިވަނީ އެ ގޭގައި ދަމާފައިވާ އިންޑިއާ އައުޓް ބެނާ ނެގުމަށް ކޯޓު އަމުރެއްގެ ދަށުންނެވެ.
ރައީސް ޔާމީންގެ ގެއަށް ފުލުހުން ވަނީ ކިއްކުރަންތޯ ސުވާލުކުރުމުން ފުލުހުންގެ އިދާރާ އިން އެކަމުގައި އަދި ވަކި އެއްޗެއް ބުނެފައެއް ނުވެ އެވެ.
ރައީސް ޔާމީންގެ ގޭގެ އެތެރޭގައި ވެސް އަދި އެ އިމާރާތުގެ ބޭރުގައި ވެސް ފުލުހުން ހަރަކާތްތެރިވަމުންދާއިރު އެ ސަރަހައްދުގައި ރައީސް ޔާމީންގެ ގާނޫނީ ޓީމުގެ ބޭފުޅުންނާއި އިދިކޮޅު ކޯލިޝަންގެ ބައެއް އިސް ބޭފުޅުން ވެސް މަޑުކޮށްގެން އެބަތިއްބެވި އެވެ.
އިންޑިއާ އައުޓް ބެނާ ނެގުމަށް ފުލުހުން މަސައްކަތް ކުރަމުންދާއިރު އެ ސަރަހައްދުގައި އިދިކޮޅު ސަޕޯޓަރުން ގެންދަނީ އިހްތިޖާޖު ވެސް ކުރަމުންނެވެ.
ރައްޔިތުންގެ މަޖިލީހުގެ އިއްޔެގެ ޖަލްސާ ފައްޓަވަމުން ރައީސް ނަޝީދު ވިދާޅުވީ "އިންޑިއާ އައުޓް" ޖަހައި މާލޭގެ ބޮޑެތި އިމާރާތްތަކުގައި ދަމަމުންދާ ބެނާތައް ދެމުން ހުއްޓުވަން ޖެހޭނެ ކަމަށެވެ. އަދި އެ ބެނާތައް ފުލުހުން ވަގުތުން ނަގަންޖެހޭނެ ކަމަށް ވެސް ވެސް ވިދާޅުވި އެވެ.
"އަޅުގަނޑު ދެކޭ ގޮތުގައި މާލޭގެ ބޮޑެތި އިމާރާތްތަކަށް އަވަށްޓެރި ގައުމުތަކާ ގުޅޭގޮތުން ބަދު ބަސް ބުނެ ބޮޑެތި ބެނާތައް ނަގާފައި ހުރުމަކީ ގާނޫނުލްއުގޫބާތާ ހިލާފު ކަމެއް. އާންމު މަސްލަހަތާ ހިލާފު ކަމެއް. އެ ތަކެތި އަޅުގަނޑު ދެކޭ ގޮތުގައި ފުލުހުން ވަގުތުން ވަގުތަށް ނަގަން ޖެހޭނެ،" ރައީސް ނަޝީދު ވިދާޅުވި އެވެ.
ނަޝީދު، ފުލުހުންނަށް އެންގެވުމެއް އެންގެވި ފަހުން ފުލުހުން ވަނީ އިދިކޮޅު ޕީޕީއެމްގެ އޮފީސް ހިންގާ -- ހ. ހުރަފާގޭގެ ވެެރިޔާ ހުސައިން ރަަޝީދަށް ފޮނުވި ސިޓީއެއްގައި އެ ގޭގައި ހަރުކޮށްފައި ހުރި އިންޑިއާ އައުޓް ބެނާ ނެގުމަށް އަންގާފަ އެވެ.
ފުލުހުންގެ ސިޓީގައި ބުނެފައިވަނީ އެ ގޭގެ ބޭރުގައި އާންމުކޮށް ފެންނާނެ ހެން "އިންޑިއާ އައުޓް" ބެނާއެއް ހަރުކޮށްފައި ބެހެއްޓުމަކީ ވަކި ގައުމަކަަށް ނިސްބަތްކޮށް އަދި އިންޑިއާގެ ގަދަރާއި ކަރާމާތަށް އުނިކަން ލިބޭ ފަދަ އަމަލެއް ކަމަށެވެ. އަދި އެކަމަކީ ބައިނަލްއަގްވާމީ ގުޅުންތަކާއި އަވައްޓެރި ގައުމުތަކާއި ރާއްޖެއާ ދެމެދު އޮންނަ ހާރިޖީ އަދި ސަގާފީ ގުޅުންތަކަށް ނުރަނގަޅު އަސަރު ކުރާނެ ކަމެއް ކަމަަށެވެ. އޭގެ ސަބަބުން އިންޑިއާގައި ދިރިއުޅޭ އަދި ޒިޔާރަތް ކުރާ ދިވެހީންގެ މަސްލަހަތަަށް ގެއްލުން ވެދާނެ ކަމަށް ފުލުހުން ދެކޭ ކަމަަށްވެސް ބުނެފައިވެ އެވެ.
ފުލުހުންގެ އެންގުމުގައި ބުނެފައިވަނީ މިފަދަ އަމަލުތަކަކީ އޭގެ ވަށައިގެން ހިންގާ ކަންކަމުގެ ސަބަބުން ރާއްޖެ އާއި ދިވެހީންގެ މަސްލަހަތަށް ގެއްލުންވާނެ ފިތުނަވެރި އަމަލުތަކެއް ކަމަަށެވެ. އަދި މިއީ ޖާއިޒު މަގުސަދެއް ހާސިލުނުވާނެ އަމަލަކުން ނުރައްކާތެރި ނުވަތަ ހުތުރު ނުވަތަ މީހުން ބިރުގަންނާނެ ފަދަ ހާލަތެއް އުފެދިދާނެ ފަދަ އަމަލެއް ކަމަށެވެ. އެހެން ކަމުން އާންމު މަސްލަހަތު ރައްކާތެރި ކުރުމަށް ހ. ހުރަފާ ބޭރުގައި ހަރުކޮށްފައިވާ އިންޑިއާ އައުޓް" ބެނާ ނަގަން އަންގާ ކަމަށެވެ.
ރައީސް ނަޝީދުގެ އެންގެވުމާއި އަދި ފުލުހުންގެ ސިޓީއާ އެއްގޮތަށް ފުލުހުން އަމަލުކޮށްފިނަމަ އެކަމުގައި ބައިވެރިވާ ވަކިވަކި ފުލުހުންނަށް ދައުވާ ކުރާނެ ކަމުގެ އިންޒާރު އިދިކޮޅު ކޯލިޝަނުން ވަނީ ދީފަ އެވެ. ރާއްޖޭގައި ތިބި އިންޑިއާ ސިފައިން ބޭލުމަށް ގޮވާލާ މާލޭގެ އިމާރާތްތަކުގައި ހަރުކޮށްފައިވާ އިންޑިއާ އައުޓް ބެނާތައް ނުނަގާނެ ކަމަށާއި އޭގެ ބަދަލުގައި އިތުރު ބެނާތައް އިތުރު އިމާރާތްތަކުގައި ދަމާނެ ކަމަށްވެސް އިދިކޮޅު ކޯލިޝަނުން ބުނެފައިވެ އެވެ.