ސިފައިންނާއި ފުލުހުންގެ ހިދުމަތުން ވަޒީފާ ދޭންވާނީ ސްކޫލު ނިންމާފައި ނިކުންނަ އިލްމީ ކުދިންނަށް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ރައީސް ޔާމީން މިހެން ވިދާޅުވެފައި މިވަނީ އޯލެވަލް ނިންމާ ކުދިންގެ ތެރެއިން އޭލެވަލްއަށް ނުދާ ކުދިންނާއި ވަޒީފާ ހޯދުމަށް ދަތިވާ ކުދިންނަށް އަސްކަރީ ތަމްރީން ހެދުމަށް މަޖުބޫރުވާ ގޮތަށް ހާއްސަ ގާނޫނެއް އެކުލަވާލުމުގެ މަސައްކަތް ކުރައްވަމުން ގެންދަވާ ކަމަށް ރައީސް ޑރ. މުހައްމަދު މުއިއްޒު ނަސްރު ދުވަހުގެ ޖަލްސާގައި ވިދާޅުވެފައި ވަނިކޮށެވެ.
ރައީސް މުއިއްޒު ވިދާޅުވީ މި ޕްރޮގްރާމު ސަބަބުން ސިފައިންގެއަށް އަހަރަކު 1000 ކުދިން އަދި ފުލުހުންގެ އިދާރާއަށް އަހަރަކު 250 ކުދިންގެ މަގުން ކުރިއަށް އޮތް ހަތަރު އަހަރު އެ ދެ އިދާރާއަށް ޖުމްލަ 5،000 މީހުން ރެކްރޫޓް ކުރާނެ ކަމަށެވެ. އެއީ ސިފައިންގެ 4،000 ކުދިން އަދި ފުލުހުންގެ އިދާރާއަށް 1،000 ކުދިންނެވެ.
ޕީއެންއެފްގެ ޖަލްސާގައި ރޭ ވާހަކަދައްކަވަމުން ރައީސް ޔާމީން ވިދާޅުވީ ސިފައިންނާއި ފުލުހުންގެ ހިދުމަތަކީ މިއަދު ރާއްޖޭގައި އެންމެ ވަރުގަދަ ދެ އިދާރާ ކަމަށެވެ. އެހެންކަމުން އެ ތަންތަނަށް ބޭނުންވާނީ ރަނގަޅު ނަތީޖާ ނެރޭ ކުދިން ކަމަށާއި އެފަދަ ކުދިން އެ ދެ އިދާރާއަށް ލިބޭނެ ކަމުގައިވެސް ވިދާޅުވި އެވެ.
"ސިފައިންނާއި ފުލުހުންގެ ތެރޭގައި އެންމެ އެކަށީގެން ނުވާ މީހުންތަކެއް ނަގައިގެން ކީއްކުރަންހޭ މި އުޅެނީ. އެތަނުގައި ފޮޅާ ސާފުކުރަންހޭ މި އުޅެނީ. އެމީހުންގެ އިލްމީ ގާބިލުކަމެއް އޮންނަން ވާނެ،" ޔާމީން ވިދާޅުވި އެވެ.
އެމަނިކުފާނު ވިދާޅުވީ ފުލުހުންނާއި ސިފައިންނަކީ ވަރަށް ޒިންމާދާރު އަދި ސްޓްރެޓެޖިކް މަސައްކަތްތަކެއް ގައުމުގެ ދިފާއުގައި ކުރަމުންދާ ބައެއް ކަމަށެވެ. އެހެންކަމުން އެ ތަންތަނަށް ހޯދަންވާނީ އިލްމީ ގާބިލް މީހުން ކަމަށްވެސް ވިދާޅުވި އެވެ.
ރައީސް ޔާމީން ވިދާޅުވީ ސިފައިންނާއި ފުލުހުންނަކީ އަބަދު މަގުމަތީގައި އެނބުރެންޖެހޭ ބައެއް ކަމަށް ދެކިގެން ނުވާނެ ކަމަށެވެ. އަދި އެ ދެ މުއައްސަސާއަށް ބޭނުންވާ ވަސީލަތްތަކާއި ދޭންޖެހޭ އެހީތެރިކަމާއި އެއްބާރުލުން ދޭންޖެހޭނެ ކަމަށްވެސް ވިދާޅުވި އެވެ.
ރައީސް ޔާމީންގެ ވާހަކަފުޅުގައި ވަނީ ރައީސް މުއިއްޒު ވިދާޅުވާ އަދަދެއް ސިފައިންނާއި ފުލުހުންގެ ހިދުމަތަށް މީހުން ބޭނުންވާނެ ކަމާ ދޭތެރޭ ސުވާލުވެސް އުފައްދަވާފަ އެވެ. އެގޮތުން ރައީސް ޔާމީން ވިދާޅުވީ އެ އަދަދަށް މީހުން ބޭނުންވާ ކަމަށް ފުލުހުންނާއި ސިފައިން މީގެކުރިން ބުނެފައިވެސް ނުވާ ކަމަށެވެ. އަދި ދައުލަތުގެ ހަރަދުތައް ވަރަށް ބޮޑަށް ކުޑަކުރަންޖެހިފައި ވަނިކޮށް ސިފައިންނާއި ފުލުހުންގެ އަދަދު އިތުރުކޮށްގެން ބަޖެޓްގެ ހަރަދުތައް ދެކޮޅު ޖައްސާނެ ގޮތެއް ނޯންނާނެ ކަމަށްވެސް ވިދާޅުވި އެވެ.