ރިސޯޓް ތަރައްގީ ކުރަން ހުޅުވާލި ފުރުސަތުގައި ބީލަން ކާމިޔާބުކޮށް ރަށްތައް ހަވާލުކުރި ވިޔަފާރިތަކުގެ ނަންތައް ހާމަ ކުރާނީ ފައިސާގެ މުއާމަލާތްތައް ނިމުމުން ކަމަށް ޓޫރިޒަމް މިނިސްޓްރީން ނިންމި ނިންމުމަކީ "ވައްކަން ފޮރުވުމު"ގެ އަމަލެއް ކަަމަށް ވިލިމާލެ ދާއިރާގެ މެންބަރު އަހުމަދު އުޝާމް ސިފަ ކުރައްވައިފި އެވެ.
ރިސޯޓް މާކެޓަށް ނެރުނު 18 ރަށުގެ ތެރެއިން ހަތް ރަށެއް ކުންފުނިތަކާއި ހަވާލު ކުރުމަށް ވަނީ ނިންމާފައެވެ. އެއީ ބިޑް ކާމިޔާބު ކުރި ހަތް ކުންފުންޏަކަށެވެ. ނަމަވެސް އެއީ ކޮން ކުންފުނިތަކެއް ކަމެއް ޓޫރިޒަމް މިނިސްޓްރީން އަދި ނުބުނެއެވެ.
އެކަމާއި ގުޅޭގޮތުން ޓޫރިޒަމުން މިއަދު ބުނީ ލީޒް އެކުއިޒިޝަން ދެއްކުމުން ބިޑް ކާމިޔާބުކުރި ކުންފުނިތައް ހާމަ ކުރާނެ ކަމަށެވެ. އެ ފައިސާ ދެއްކުމަށް ބިޑް ކާމިޔާބު ކުރި ފަރާތްތަކަށް ދެ މަސް ދުވަހުގެ މުއްދަތެއް ދީފައިވާ ކަމަށްވެސް ބުންޏެވެ.
އެކަމާއި ގުޅިގެން އުޝާމް ވިދާޅުވީ މިއީ މީގެ ކުރިން އެ މިނިސްޓްރީން އަމަލުކުރަމުން އައި ގޮތެއް ނޫން ކަމަށެވެ. އަދި ބިޑް ހުށަހެޅި ފަރާތްތަކާއި އެ ފަރާތްތަކުން ހުށަހެޅި އަގުތައް އަދި ބިޑް ކާމިޔާބުކުރާ ފަރާތްތަކުގެ ނަންތައް ހާމަކުރުން އެއީ ބެސްޓް ޕްރެކްޓިސް ކަމަށް ވިދާޅުވިއެވެ.
"މި ސަރުކާރުން މި ވަރަށް ކަންކަން ސިއްރު ކުރަނީ ސަރުކާރު ތެރޭގައި ހިންގަމުންދާ ވައްކަންތައް ފޮރުވުމަށް،" އުޝާމް ވިދާޅުވިއެވެ.