މި ސަރުކާރުން ހިޔާނާތްތެރިވުމަށް އެއްވެސް ޖާގައެއް ނުދޭނެ ކަމަށާ އެއްވެސް މީހަކަށް އަނިޔާވެރިވެ އަދި އަނިޔާވެރިވުމަށް ފުރުސަތުވެސް ނުދޭނެ ކަމަށް ރައީސުލްޖުމްހޫރިއްޔާގެ އޮފީހުން ބުނެފި އެވެ. އެ އޮފީހުން މިހެން ބުނެފައިވަނީ އެމްޑީޕީ އާއި އެމަނިކުފާނުވެސް ބޭނުންވަނީ ހިޔާނާތްތެރި ނުވާނެ ސަރުކާރެއް ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު މިރޭ ވިދާޅުވި ވިދާޅުވުމާއި ގުޅިގެންނެވެ.
އެމްޑީޕީގެ ބޮޑު މެޖޯރިޓޯއެއް އޮތް ސަރުކާރާ ދެކޮޅަށް ނަޝީދު ވާހަކަ ދައްކަވަމުން ގެންދަވާ ވަގުތެއްގައި އެމަނިކުފާނު މިރޭ ކުރެއްވި ޓްވީޓެއްގައި ވިދާޅުވީ އެމްޑީޕީ އާއި އެމަނިކުފާނުވެސް އަބަދުވެސް ބޭނުން ވަނީ ވަރަށް އާދައިގެ ކަމެއް ކަމަށެވެ. އެއީ އެއްވެސް ސަރުކާރަކުން ހިޔާނާތްތެރި ނުވުން ކަމަށްވެސް ވިދާޅުވިއެވެ. އަދި އެކަކާއި އަނެކަކު ތަފާތު ނުކުރުމާއި އަނިޔާވެރި ނުވުން ކަމަށެވެ.
"އެމްއެމްޕީއާރުސީގެ މައްސަލަ އާއި ވެންޓިލޭޓަރު މައްސަލަ ބެލުން އެއީ އިތުބާރު ލިބޭނެ ކަންކަން،" އިންޑިއާގައި ހުންނަވާ ކުރެއްވި ޓްވީޓްގައި ނަޝީދު ވިދާޅުވިއެވެ.
ނަޝީދުގެ އެ ވާހަކަތަކަށް ސަރުކާރުގެ ޖަވާބު ދެއްވަމުން ރައީސުލްޖުމްހޫރިއްޔާގެ ޗީފް އޮފް ސްޓާފް އަލީ ޒާހިރު ދެންމެ ވިދާޅުވީ މި ސަރުކާރުން ހިޔާނާތްތެރިވުމަށް ޖާގަ ނުދޭނެ ކަމަށެވެ. އަދި އެއްވެސް މީހަކާމެދު ތަފާތު ކުރުން ނުގެންގުޅޭނެ ކަމަށެވެ. އެއްވެސް މީހަކަށް އަނިޔާވެރި ނުވާނެ ކަމަށާ އަދި އަނިޔާވެރިވުމަށް ފުރުސަތުވެސް ނުދޭނެ ކަމަށް ވިދާޅުވިއެވެ.
"ކޮންމެ މީހަކާމެދުވެސް ހުށައެޅޭ އަދި ތުހުމަތު ކުރެވޭ މައްސަލައެއް ފުރިހަމައަށް ބަލާ ތަހުގީގު ކުރުމުގެ ފުރިހަމަ އިހުތިޔާރު މުއައްސަސާތަކަށް ވާނީ ދީފައި. އެފަދަ ކަމަކަށް ސަރުކާރުން ނުފޫޒު ނުފޯރުވާނެ،" އަލީ ޒާހިރު ވިދާޅުވިއެވެ.
އޭނާ ވިދާޅުވީ ސަރުކާރުގެ އެދެނީ ދައުލަތުގެ އެއްވެސް ބާރަކުން އަދި މުއައްސަސާއަކުންވެސް އެއްވެސް ފަރާތަކަށް ނުފޫޒު ނުފޯރުވުން ކަަމަށެވެ.
މި ސަރުކާރުން ހިޔާނާތްތެރިވުމަށް ޖާގައެއް ނުދޭނެ. އެއްވެސް މީހަކާމެދު ތަފާތު ކުރުން ނުގެންގުޅޭނެ. އަދި އެއްވެސް މީހަކަށް އަަނިޔާވެރި ނުވާނެ، އަނިޔާވެރި ވުމަށް ފުުރުސަތެއްވެސް ނުދޭނެ. ކޮންމެ މީހަކާމެދުވެސް ހުށައެޅޭ އަދި ތުހުމަތު ކުރެވޭ މައްސަލައެއް ފުރިހަމައަށް ބަލާ ތަހުގީގު ކުރުމުގެ ފުރިހަމަ އިހުތިޔާރު މުއައްސަސާތަކަށް ވާނީ ދީފައި. އެފަދަ ކަމަކަށް ސަރުކާރުން ނުފޫޒު ނުފޯރުވާނެއަލީ ޒާހިރު | ޗީފް އޮފް ސްޓާފް
ރައީސް ނަޝީދު ފަހަކަށް އައިސް ގެންދަވަނީ ސަރުކާރުގެ ސިޔާސަތުތަކަށާއި ސަރުކާރަށް ތާއީދުކުރާ މަޖިލީހުގެ ބައެއް މެންބަރުންނަށް ވެސް ފާޑު ވިދާޅުވެ ވާހަކަދައްކަވަމުންނެވެ. އެގޮތުން ދެކުނުގެ މަސްވެރިކަން ރަނގަޅުވެ، މަސްވެރިން ބާނާ ހުރިހާ މަހެއް މިފްކޯ އަށް ވަގުތުން ވަގުތަށް ގަނެވޭ ގޮތް ނުވުމުން އެކަމަށްވެސް ނަޝީދު ފާޑު ވިދާޅުވި އެވެ.
މަސްވެރިން ބާނާ މަހަށް ހަދާނެ ގޮތް ނުވިސްނިގެން ނޫޅޭ ކަމަށާއި ސަރުކާރުން އެގޮތް ނުހަދަނީ ކަމަށް ވިދާޅުވެ ނަޝީދު މިފަހުން ވަނީ ޓްވީޓެއް ވެސް ކުރައްވާފަ އެވެ. ޓްވީޓް ކުރެއްވެވީ ވެސް މަސްވެރިން ބާނާ މަސް ގަތުމުގެ މައްސަލައިގައި އަންހެނަކު ނުރުހުންވެ ސަރުކާރަށް ވަރަށް ބޮޑަށް ފާޑުކިޔާފައިވާ ވީޑިއޯއަކާ ވެސް އެކުގަ އެވެ.
އެމްޑީޕީގެ އެތެރޭގެ އިންތިހާބުގައި ޗެއާޕާސަންގެ މަގާމަށް ވާދަކުރައްވަމުން ގެންދަވާ އިކޮނޮމިކް މިނިސްޓަރު ފައްޔާޒު އިސްމާއީލްގެ ކެމްޕޭންގައި އިސްކޮށް އުޅުއްވާ ބޭފުޅުންނަށް ވެސް ނަޝީދު ގެންދަވަނީ ތަކުރާރުކޮށް ބަހުގެ ހަމަލާތައް ދެއްވަމުންނެވެ.
މީގެއިތުރުން އެމްޑީޕީގެ ގައުމީ މަޖިލީހުގެ ވަޓްސްއެޕް ގުރޫޕްގައި ރައީސް ނަޝީދު ވަނީ އެމަނިކުފާނުގެ ނަޒަރުގައި އެމްޑީޕީއަށް ރައްޔިތުންގެ ވޯޓްގެ 50 ޕަސެންޓް ހޯދުންވެސް ދެން ވަރަށް އުނދަގޫ ވާނެ ކަމަށް ވިދާޅުވެފަ އެވެ. އެ މިންވަރަށް ތާއީދު ހޯދޭވަރަށް ވުރެ މާގިނަ ގޯސްތައް ސަރުކާރުން ހަދާފައިވާ ކަމަށްވެސް ތުހުމަތުކުރެއްވެވި އެވެ. އަދި މިއަހަރަކީ ދައުލަތުން ދަރަނީގެ ގޮތުގައި އެންމެ ބޮޑު ހަރަދެއް ކުރަންޖެހޭ އަހަރު ކަމަށްވީ ނަމަވެސް ސަރުކާރުން އެކަމަށް އެއްވެސް ވަރެއްގެ ސަމާލުކަމެއް ނުދޭ ކަމަށެވެ. އޭގެބަދަލުގައި ފެނިގެންދަނީ އަމިއްލަ މަސައްކަތްތައް ހިތުހުރި ގޮތަކަށް ކުރަމުންދާ ތަން ކަމުގައިވެސް ނަޝީދު ވިދާޅުވެފައިވެ އެވެ.