ގާތް މީހަކަށް ވަޒީފާއެއް ހަމަޖައްސައިދިނުމަށް އެދި ސަރުކާރުގެ ކުންފުންޏެއްގެ އިސްވެރިއަކަށް، މާފަންނު އުތުރު ދާއިރާގެ މެންބަރު އިމްތިޔާޒް ފަހްމީ ފޮނުއްވެވި މެސެޖްތަކެއް އާންމުވެއްޖެ އެވެ.
މިފަދަ މެސެޖްތަކެއް އާންމުވެފައި މިވަނީ ކުރިއަށް އޮތް އެމްޑީޕީގެ ޗެއާޕާސަން އިންތިހާބުގެ ކެމްޕެއިންގައި ސަރުކާރުގެ ވެރީންގެ އަރިހުގައި އެދިގެން އެއްވެސް މީހަކަށް ވަޒީފާއެއް ހޯދާދޭން އޭނާ މަސައްކަތް ކޮށްފައިނުވާނެ ކަމަށް އިމްތިޔާޒް ވިދާޅުވެފައި ވަނިކޮށެވެ. އަދި އޭނާއާ ވާދަކުރައްވާ އިކޮނޮމިކް މިނިސްޓަރު ފައްޔާޒް އިސްމާއީލަށް އަމާޒު ކުރައްވާ، އެމްޑީޕީގެ މުވައްޒިފުންނަށް ވަޒީފާގެ ބިރު ދައްކާ އަދި އިންތިހާބާ ދިމާކޮށް ވަޒީފާތަކަށް މީހުން ލަމުންދާ ކަަމަށް ތުހުމަތު ކުރައްވާފައި ވަނިކޮށެވެ.
އައިމިނަތު ތޮއިބާ ހަސަން ކިޔާ މީހަކަށް ވަޒީފާއެއް ހަމަޖައްސައިި ދިނުމަށް އެދި އިމްތިޔާޒް މެސެޖް ކުރައްވާފައިވާ މިހާރު އެޗްޑީސީގެ ދަށުގައި އޮތް ކުރީގެ ގްރޭޓާ މާލެ ކުންފުނީގެ ޗެއާމާން ޝާތިރު އަށެވެ. އެ މެސެޖްގައި އިމްތިޔާޒް ވަނީ އެއީ އައްޑޫ ސިޓީގެ އެމްޑީޕީގެ ރައީސް އަދްހަމްގެ އެއްބަނޑު އެއްބަފާ މީހަކަށް ވަޒީފާއެއް ހަމަޖައްސައިދިނުމަށް އެދިފައެވެ.
އަދި އެ އަންހެން މީހާ އޭރު އަދާކުރަމުން ދިޔަ ވަޒީފާގެ ތަފްސީލް ކޮށްފައިވެއެވެ.
އޭގެ ފަހުން އޮގަސްޓް 7، 2021 ގައި ވަޒީފާގެ ކަންކަން ހަމަނުޖެހި ފަސްވަމުންދާތީވެސް މެސެޖެއް ކުރައްވާފައިވެއެވެ. އެ މެސެޖްގައި ވަޒީފާގެ ކަންކަން ކޮބައިތޯ ސުވާލު ކުރައްވާފައިވެއެވެ. އަދި އިންޓަވިއުއަށް ފަހު ހަބަރެއް ނުވާތީ އަންގާލެއްވީ ކަމަށް ވިދާޅުވެފައިވެއެވެ.
"ޗެއާމަން ވިދާޅުވީމެއްނު ތީ ޗެއާމަންގެ އަތްމަތީ އޮންނަ ކަމެކޭ ތި ޖޮބް [ވަޒީފާ] ގެ ކަމަކީ،"
ފަހުން އޮގަސްޓް 15 ގައި އެ ވަޒީފާ ހަމަޖެހުމުން ޝާތިރަށް ޝުކުރު އަދާކުރައްވާ އިމްތިޔާޒް ވަނީ މެސެޖެއް ކުރައްވާފައެވެ.
މި މެސެޖްތަކުގެ ސައްހަކަން ސަރުކާރުގެ އިސް އޮފިޝަލަކު ޔަގީން ކޮށްދެއްވިއެވެ. މިހާރު ސޯޝަލް މީޑިއާގައި އާންމުވެފައިވާ މި މެސެޖްތަކާއި ގުޅޭގޮތުން އިމްތިޔާޒް ވަކި އެއްޗެއް ވިދާޅެއް ނުވެއެވެ.