ރާއްޖޭގެ މޫސުން ގޯސްވެ މުޅި ރާއްޖެއަަށް ވައިޓް އެލާޓް ނެރެފި އެވެ.
މެޓް އޮފީހުން މި އެލާޓް ނެރެފައިވަނީ މާދަމާ މެންދުރު ފަހާއި ހަމައަށެވެ. އެ އޮފީހުން ދެންމެ ބުނީ މި ވަގުތުތަކުގައި ބޯކޮށް ވާރޭވެހުމާއެކު ގުގުރާނެ ކަމަށެވެ. އަދި ވައި ވަރަަށް ގަދަވާނެ ކަމަށެވެ.
ވިލާގަނޑުގައި 45 މޭލަށް ވައިގަދަވާނެ ކަމަށް ވަނީ ލަފާ ކޮށްފައެވެ.
މުޅި ރާއްޖެއަަށް ވައިޓް އެލާޓް ނެރެފައިވާއިރު މިއަދު މެންދުރު ފަހުން ފެށިގެން މާލެއަށް ހުއްޓާ ނުލާ ދަނީ ވާރޭވެހެމުންނެވެ. މިހާރު ވައިވެސް ވަރަށް ގަދައެވެ. އެހާ ގިނައިރު ވާރޭވެހުމުން މާލޭގެ ވަރަށް ބޮޑު ބައެއްގައި ވަނީ ފެންބޮޑުވެ އާންމު ދިރިއުޅުމަށް ބުރޫ އަރާފައެވެ.
މެޓް އޮފިޝަލަކު ވިދާޅުވި ގޮތުގައި ކުރިއަށް އޮތް ހަތަރު/ފަސް ދުވަހު މޫސުން ގޯސްވާނެ އެވެ. މޫސުން އަލިވާން ފަށާނީ ހަފްތާ ބަންދުގައި ކަމަށް ލަފާ ކުރެވެއެވެ.