އެމްޑީޕީގެ ކޮންގްރެސްގައި ބައިވެރިވުމަށް މިހާތަނަށް 823 މީހަކު ރަޖިސްޓްރީކޮށްފައިވާ ކަމަށް އެޕާޓީން ބުނެފި އެވެ.
ކޮންގްރެސްގެ އެންމެ ފަހުގެ މައުލޫމާތު ހިއްސާކުރައްވަމުން އެމްޑީޕީގެ ޗެއާޕާސަންގެ ނައިބުގެ މަގާމަށް ހޮވިފައިވާ އިބްރާހީމް ވަހީދު (އިބްރޭ) ވިދާޅުވީ ކޮންގްރެސްގައި ބައިވެރިވުމަށް އެޕާޓީގެ 1،447 މީހަކަށް ދައުވަތު ދީފައިވާނެ ކަމަށެވެ.
ކޮންގްރެސްގައި ބައިވެރިވުމަށް ދައުވަތު ދިން މީހުންގެ ތެރެއިން ރަޖިސްޓްރީ ނުވާ މީހުންނަށް ކޮންގްރެސްގައި ބައިވެރިނުވެވެ އެވެ.
އެމްޑީޕީގެ ކޮންގްރެސްގައި މުހިއްމު ނިންމުންތަކެއް ނިންމާނެތީއާއި އެމްޑީޕީގެ އަސާސީ ގަވައިދަށް ބައެއް އިސްލާހުތައް ހުށަހަޅައި ފާސްކުރާނެތީވެ އިލެކްޝަންސް ކޮމިޝަންގެ އޮފިޝަލުން ކޮންގްރެސްއަށް ހާޒިރުވާނެ އެވެ. ކޮންގްރެސްގައި މެހްމާނުންގެ ގޮތުގައި ބައިވެރިވުމަށް ރާއްޖޭގައި ހިންގާ ހުރިހާ ސިޔާސީ ޕާޓީތަކެއްގެ މަންދޫބުންނަށް ވެސް އެމްޑީޕީން ވަނީ ދައުވަތު ދީފަ އެވެ.
ކޮންގްރެސްގައި ކީނޯޓް ސްޕީޗް ދެއްވަން ހާއްސަ ބޭފުޅަކު ގެނައުމަށް ކުރިން މަސައްކަތްތަކެއް ކުރަން ނިންމި ނަމަވެސް މިހާރު އެކަން ހުއްޓާލާފައިވާ ކަމަށް އިބްރޭ ވިދާޅުވި އެވެ.
އެމްޑީޕީގެ ކޮންގްރެސް ބޭއްވުމަށް ނިންމާފައިވަނީ މިމަހުގެ 19 އިން 21 އަށް މާލޭގެ ޒުވާނުންގެ މަރުކަޒުގަ އެވެ. އެމްޑީޕީގެ ކޮންގްރެސް އަށް ޒުވާނުންގެ މަރުކަޒު ކުއްޔަށް ދޫކުރުމަށް ޔޫތު މިނިސްޓްރީން މިހާރު ވަނީ ނިންމާފަ އެވެ.
މިއީ އެމްޑީޕީގެ ލީޑަޝިޕްގައި ހިމެނޭ ޗެއާޕާސަން އާއި، ޕާލިމެންޓްރީ ގުރޫޕްގެ ލީޑަރާއި، އަންހެނުންގެ ރޫހުގެ ރައީސްއާއި، ޒުވާނުންގެ ރޫހުގެ ރައީސް ބަދަލުވި ފަހުން ބާއްވާ އެމްޑީޕީގެ ފުރަތަމަ ކޮންގްރެސް އެވެ.
އެމްޑީޕީން އެންމެ ފަހުން ކޮންގްރެސްއެއް ބާއްވާފައިވަނީ 2018 ވަނަ އަހަރުގެ ޖޫން މަހު އއ. އުކުޅަހުގަ އެވެ. އެ ކޮންގްރެސްގައި ނިންމި އެންމެ މުހިއްމު ނިންމުމަކީ އެމްޑީޕީން ރިޔާސީ ކެންޑިޑޭޓުގެ ގޮތުގައި ރައީސް އިބްރާހީމް މުހައްމަދު ސޯލިހް ހަމަޖެއްސުމެވެ. އެގޮތަށް ނިންމީ އެމްޑީޕީގެ ރިޔާސީ ޕްރައިމަރީގައި ރައީސް މުހައްމަދު ނަޝީދު އެކަނި ވާދަކުރައްވައި ޓިކެޓް ހޯއްދެވި ނަމަވެސް އެމަނިކުފާނު އޭރު ހުކުމެއްގައި ހުންނެވުމާ ގުޅިގެން އިންތިހާބުގައި ވާދަކުރެވެން ނެތުމުންނެވެ.
އެމްޑީޕީގެ ސާފު އަގުލަބިއްޔަތު އޮތް ރައްޔިތުންގެ މަޖިލީހަށް ހުށަހަޅައިގެން ގާނޫނުއަސާސީއަށް ބޮޑެތި އިސްލާހުތަކެއް ގެނައުމަށް ނިންމާފައިވާތީ އެމްޑީޕީން މިމަހު ބާއްވާ ކޮންގްރެސްގައި އެ އިސްލާހުތައް މަޖިލީހަށް ހުށަހެޅުމާ މެދު ގޮތެއް ނިންމާނެ އެވެ. އެގޮތުން ރިޔާސީ އިންތިހާބުގައި 30 ޕަސެންޓަށް ވުރެ މަދުން ވޯޓު ލިބިއްޖެ ނަމަ އެންމެ ގިނަ ވޯޓު ލިބޭ ދެ ކެންޑިޑޭޓުންގެ މެދުގައި ދެވަނަ ބުރެއް ބޭއްވުމުގެ އުސޫލެއް ގާނޫނުއަސާސީގައި ހިމެނުމަށް ހުށަހަޅުއްވާނެ ކަމަށް ރައީސް ނަޝީދު ކުރިން ވިދާޅުވެފައިވެ އެވެ. އެފަދަ އިސްލާހެއް ގެންނަނީ އެމްޑީޕީން ކުރިއަށް އޮތް އިންތިހާބުވެސް ކާމިޔާބުކޮށް ވެރިކަމުގައި ތިބެން ރައްޔިތުން ބޭނުންވާތީ ކަމަށްވެސް ނަޝީދު ވިދާޅުވެފައިވެ އެވެ. އަދި ވެރިކަމުގެ ނިޒާމު ބަދަލުކުރުމާއި ޖޭއެސްސީ އެކުލެވިގެންވާ ގޮތް ބަދަލުކުރުމާ ގުޅޭ އިސްލާހުތަކަށްވެސް ކޮންގްރެސްގައި ބަހުސްކުރާނެ ކަމަށް މައުލޫމާތު ލިބެ އެވެ.
އިބްރާ އިތުރަށް ވިދާޅުވީ ގާނޫނުއަސާސީއަށް ހުށަހަޅަން ބޭނުންވާ އިސްލާހުތަކަކީ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހުށަހަޅުއްވާ އިސްލާހުތަކެއް ކަމަށާއި، ކޮންގްރެސް އަށް ހުށަހެޅުމަށް އެ އިސްލާހުތައް އަދި ލިބިފައި ނުވާ ކަމަށެވެ. އެމްޑީޕީގެ ކޮންގްރެސްގައި ޕާޓީގެ ރިޔާސީ ޕްރައިމަރީއާ ގުޅޭގޮތުން އެއްވެސް މައްސަލައެއް އެޖެންޑާކޮށް މަޝްވަރާކުރުން ހިމެނިފައި ނެތް ކަމަށްވެސް އިބްރޭ ވިދާޅުވެފައިވެ އެވެ.