އެމްޑީޕީއަކީ ރާއްޖެއަށް އުއްމީދާއި ހެޔޮ ބަދަލު ގެނެސްދޭ އެންމެ ފަޚުރުވެރި ޕާޓީކަމަށް އެ ޕާޓީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ޝާހިދު މިހެން ވިދާޅުވީ އެމްޑީޕީގެ ކުރީގެ ބައެއް އިސް ބޭފުޅުން އެނބުރި އެޕާޓީއާއި ގުޅިވަޑައިގަތުމާ ގުޅިގެން އެބޭފުޅުންނަށް މަރުޙަބާ ދަންނަވައި، އެކްސް ޕްލެޓްފޯމްގައި މިއަދު ކުރެއްވި ޕޯސްޓެއް ގައެވެ.
އެމްޑީޕީއާ އަލަށް ގުޅިވަޑައިގެންނެވި އެޕާޓީގެ ކުރީގެ ނައިބް ރައީސް މުހައްމަދު ޝިފާޒްއާއި، ކުރީގެ ޗެއާޕާސަން ހަސަން ލަތީފް އަދި ކުރީގެ ޕީޖީ ލީޑަރު އަލީ އާޒިމްގެ އިތުރުން ޕާޓީގެ ޕޮލިސީ ކޮމިޓީގެ ކުރީގެ މުގައްރިރު އަދި އެސްޓީއޯގެ ކުރީގެ އެމްޑީ ހުސައިން އަމްރު އަށް ޝާހިދު ވަނީ މަރުހަބާ ވިދާޅުވެފަ އެވެ.
ޝާހިދު ވިދާޅުވީ އެނާ އެދިވަޑައިގަންނަވަނީ ޑިމޮކްރަސީ ހަރުދަނާކޮށް، ރައްޔިތުންގެ ބާރުވެރިކަން އިތުރުކުރުމަށް އެމްޑީޕީ އިން ކުރަމުންގެންދާ މަސައްކަތްތަކުގައި ބައިވެރިވެވަޑައިގަތުމަށް ވީހާވެސް ގިނަ ބޭފުޅުން އެޕާޓީއާ ގުޅިވަޑައިގަތުމަށް ކަމަށެވެ.
ސިޔާސީ ބޭފުޅުންތަކެއް އެމްޑީޕީއާ ގުޅިފައި މިވަނީ މިމަހުގެ 31 ވަނަ ދުވަހު އެ ޕާޓީން ބޮޑު އެއްވުމަކަށް ތައްޔާރުވަމުންދާ ވަގުތެއްގައެވެ.