ރާއްޖެ ޓްރާސްޕޯޓް ލިންކްގެ ހައިސްޕީޑް ފެރީގެ ހިދުމަތް ފެށުމުގެ ކުރިންވެސް މުލަކަތޮޅުގެ ފެރީގެ ހިދުމަތަށް ދިމާވެފައިވާ ދަތިތަކަށް ހައްލެއް ހޯއްދަވައި ދެއްވާނެ ކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
ރައީސުލްޖުމްހޫރިއްޔާ މިހެން ވިދާޅުވީ، މ. މުލީ ރައްޔިތުންނާއި އެރަށުގައި މިއަދު ބައްދަލުކުރައްވައި ދެއްކެވި ވާހަކަފުޅުގައެވެ. މި ބައްދަލު ކުރެއްވުން އޮތީ މިއަދު ހަވީރު މ. އަތޮޅު ތައުލީމީ މަރުކަޒުގެ ހޯލުގައެވެ.
ރައްޔިތުންނާއި އެކު ބޭއްވި މި ބައްދަލުވުމުގައި ރައްޔިތުން ވަނީ ރަށުގެ ބަނދަރު މަރާމާތު ކުރަން ޖެހިފައިވުމާއި ގަވާއިދުން ފެރީގެ ހިދުމަތް ލިބެމުން ނުދިޔުމާއި އެއާޕޯޓުގެ މަސައްކަތާއި ކޯޒުވޭ އާއި ހޮސްޕިޓަލާއި އަތޮޅު ތައުލީމީ މަރުކަޒުގެ ތަރައްގީއަށް ކުރަން ބޭނުން ވެފައިވާ މަސައްކަތްތައް ފާހަގަކޮށްފައެވެ.
ރައީސް ވަނީ މުލަކަތޮޅުގެ ފެރީގެ ހިދުމަތަށް ދިމާވެފައިވާ ދަތިތަކަށް ހައްލެއް ހޯއްދަވައި ދެއްވާނެ ކަމުގައި ވިދާޅުވެފައެވެ. އެ އަތޮޅަށްވެސް ރާއްޖެ ޓްރާސްޕޯޓް ލިންކްގެ ހައިސްޕީޑް ފެރީގެ ހިދުމަތް ލިބޭނެ ކަމަށާ ނަމަވެސް އޭގެ ކުރީންވެސް ފެރީގެ ހިދުމަތަށް ދިމާވެފައިވާ ދަތިތަކަށް ހައްލެއް ހޯއްދަވައި ދެއްވާނެ ކަމުގައި ވިދާޅުވިއެވެ.
މުލީ ރީޖަނަލް ހޮސްޕިޓަލްގެ ހިދުމަތާއި ގުޅޭ ގޮތުން ރައީސުލްޖުމްހޫރިއްޔާ ވިދާޅުވީ ހޮސްޕިޓަލްގެ ހިދުމަތް ރަނގަޅު ކުރުމަށް ކޮށްދެއްވެން ހުރި ހުރިހާ މަސައްކަތެއް ކޮށްދެއްވާނެ ކަމަށެވެ. އަދި ރައްޔިތުންގެ އެންމެ ބޮޑު އެއް ކަންބޮޑުވުމެއް އޮތް ބަނދަރުގެ މައްސަލަ ހައްލުކުރުމަށްޓަކައި ބަނދަރުގެ ޑިޒައިނާއި ކުރެހުން ނިންމާފައިވާކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
މ. އަތޮޅުގެ ފަސްރަށަކަށް ރައީސުލްޖުމްހޫރިއްޔާ ފެށްޓެވި ދަތުރުފުޅުގައި އެންމެ ފަހުން ވަޑައިގެންނެވީ މ. މުއްޔަށެވެ. ރައީސުލްޖުމްހޫރިއްޔާގެ މި ދަތުރުފުޅު ނިންމަވާލެއްވުމަށްފަހު މާލެ ވަޑައިގަންނަވާނީ މާދަމާގެ ވަގުތެއްގައެވެ.