ސަރުކާރު ހިންގާ ޕްރޮގްރެސިޕް ޕާޓީ (ޕީޕީއެމް) ގެ ހާއްސަ ޖަލްސާއެެއް މިމަހުގެ 21 ވަނަ ދުވަހުގެރޭ ކާނިވާ ސަރަހައްދުގައި ބާއްވާން އެ ޕާޓީން ނިންމައިފި އެވެ.
ޕީޕީއެމުން މިއަދު ބޭއްވި ނޫސްވެރިންގެ ބައްދަލުވުމެެއްގައި އެ ޕާޓީގެ ނައިބު ލީޑަރު އަބްދުއްރަހީމް އަބްދުﷲ ވިދާޅުވީ ޕީޕީއެމްގެ ހަރަކާތެއް ނުބާއްވާތާ އެތައް ދުވަހެއް ފަހުން ބާއްވާ ބޮޑު ޖަލްސާއަކީ ސަރުކާރު ޕްރޮމޯޓު ކުރުމުގެ ބާއްވާ ބޮޑު ރެލީއެއް ކަމަށެވެ. އަދި ހަރަކާތްތަކެއް އެޕާޓީން މިދުވަސްކޮޅު ކުރިއަށް ނުގެންދިޔަ ނަމަވެސް އެޕާޓީން ސަރުކާރު ޕްރޮމޯޓުކޮށް ސަރުކާރަށް އެއްބާރުލުންދޭން ގިނަ ކަންތައްތަކެއް ކުރަމުން އަންނަ ކަމަށެވެ.
އޭނާ ވިދާޅުވީ ބޮޑު ޖަލްސާފައި ޕީޕީއެމްގެ މުސްތަޝާރު ރައީސް އަބްދުﷲ ޔާމީން އަބުދުލް ގައްޔޫމާއި، ޕީޕީއެމްގެ ރައީސް މައުމޫން އަބްދުލް ގައްޔޫމާއި، ޕީޕީއެމްގެ ޕީޖީ ގްރޫޕްގެ މެމްބަރުންނާއި ކައުންސިލް މެމްބަރުން ބައިވެރިވެ ވަޑައިގަންނަވާނެ ކަމަށެވެ.
"މިޖަލްސާގައި ރައީސް އަބްދުﷲ ޔާމީނާއި، ޕީޕީއެމްގެ ރައީސް މައުމޫން ރައްޔިތުންނަށް އުފާވެރި އެތައް ހަބަރެއް ދެއްވާނެ،" އޭނާ ވިދާޅުވި އެވެ.
ޕީޕީއެމްގެ ޓީމްތައް މިމަހުގެ ތެރޭގައި އަތޮޅުތަކަށް ދަތުރުތައް ކުރަން ފަށާނެ ކަމަށާއި އެދަތުރުތަކަކީ ޕާޓީގެ މެމްބަޝިޕް އިތުރުކޮށް، ޕާޓީގެ ހަރަކާތްތައް ރަށް ރަށުގައި ކުރިއަށް ގެންދިއުމަށް ކުރައްވާ ދަތުރުތަކެއް ކަމަށް ވެސް އޭނާ ވިދާޅުވި އެވެ.
މި ބައްދަލުވުމުގައި ޕީޕީއެމްގެ ޕީޖީ ގްރޫޕްގެ ލީޑަރު އަދި ވިލިމާލޭ ދާއިރާގެ މެމްބަރު އަހްމަދު ނިހާން ހަސަން މަނިކު ވިދާޅުވީ އެ ޖަލްސާ ވެގެން ދާނީ ރާއްޖޭގެ ސިޔާސީ ނާރެހަށް ވަރަށް ގިނަ މުހިއްމު އާ މައުލޫމާތު ތަކާއި، މުހިއްމު އުއްމީދުތަކެއް އާލާވެގެންދާނެ ޖަލްސާއެއް ކަމަށެވެ.
ރައްޔިތުންގެ މަޖިލީހުގެ ކެލާ ދާއިރާގެ މެމްބަރު އަދި ޕީޕީއެމްގެ ތަރުޖަމާނު އަލީ އާރިފް ވިދާޅުވީ މި ފެށުނު 2016 ވަނަ އަހަރަކީ މިސަރުކާރަށް ތާއީދުކުރާ މީހުންނާއި މި ސަރުކާރަށް ތާއީދުނުކުރާ މީހުންނަށް "ބޭއިހިތިޔާރުގައި އަތްޖެހޭނެ" އަހަރަކަށް ވާނެ ކަމަށެވެ.
"މިސާލަކަށް ދާދި މިދާކަށް ދުވަހު ޓޫރިޒަމް މިނިސްޓަރު ޗައިނާއަށް ކުރެއްވި ދަތުރުފުޅުގައި އެވަޑައިގަތީ ރާއްޖޭގެ ތާރީހު ނުދެކޭ ފަދަ ބޮޑު ލޯނު ފައިސާގެ އަދަދެއް ހިފައިގެން. 173 މިލިއަން ޑޮލަރު. ރާއްޖޭގެ ސަރުކާރުގެ މިހާތަނަށް އެއްވެސް ސަރުކާރަކަށް ދެއްވާފައި ހުރި ފައިސާގެ އަދަދެއް ނޫން. އަދި މިއަހަރު ފެށިގެންދާނެ ބްރިޖްގެ އަމަލީ މަސައްކަތް. މިދެންނެވި 173 މިލިއަން ޑޮލަރާއި ބްރިޖްގެ 200 މިލިއަން ޑޮލަރާއިއެކު 573 މިލިއަން ޑޮލަރަކީ 8.83 ބިލިއަން ދިވެހި ރުފިޔާ. މީގެން މި އެނގެނީ މިސަރުކާރަށް ބޭރުގެ ސަރުކާރުތަކުންނާއި ދިވެހި ރައްޔިތުން ކުރައްވާ އިތުބާރު." އަލީ އާރިފް ވިދާޅުވި އެވެ.
ޕީޕީއެމުން މީގެ ކުރިން ބޭއްވި ނޫސްވެރިންގެ ބައްދަލުވެއްގެ ތެރެއިން: ހަވަރު އެއްކުރުމަށް ރައްޔިތުން އިޖާބައެއް ނުދިން، ސަރުކާރަށް އޮތް ތާއިދު ހާމަވެއްޖެ.- އަވަސް ފޮޓޯ