ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްގޭމް)ގެ އަހަރީ އާއްމު ޖަލްސާ ބާއްވައިފި އެވެ.
މާފުށީގައި މިއަދު އެ ޖަމިއްޔާ އިން ބޭއްވި އަހަރީ އާއްމު ޖަލްސާގައި ވާހަކަދައްކަވަމުން އެންއެޗްގޭމްގެ ރައީސް އަބްދުﷲ ނާޝިދު ވިދާޅުވީ ޔޫކްރޭން ހަނގުރާމައިގެ ސަބަބުން ގެސްޓްހައުސް ވިޔަފާރި ހީނަރުވެ 15 ޕަސެންޓުގެ ދަށްވުމެއް އައިސްފައިވާ ކަމަށެވެ. އަދި މިހާރު ކުރަން ޖެހިފައިވާ ކަމަކީ މި ސިނާއަތަށް އެހީވުން ކަމަށާ، އެ ޖަމިއްޔާއިން އެކަން ކުރާނެ ކަމަށެވެ.
މި ރަސްމިއްޔާތުގައި އަބްދުﷲ ވިދާޅުވީ ކޮވިޑަށްފަހު ގެސްޓްހައުސް ސިނާއަތް ހުޅުވިގެން ގޮސްފައިވަނީ ސަރުކާރުން އެޅި ފިޔަވަޅުތަކުގެ ސަބަބުންނެވެ. އެގޮތުން އަވަހަށް މި ދާއިރާ ހުޅުވުމަކީ ލިބުނު އެންމެ ބޮޑު އެހީގެ ގޮތުގައި ފާހަގަކުރެއްވި އެވެ.
އޭޖީއެމްގައި އެ ޖަމިއްޔާއިން ވަނީ އަމިއްލަ ކުންފުންޏަކާ ހަވާލުކޮށްގެން އެ ޖަމިއްޔާއިން އެންއެޗްޖީއެމް ރީބްރޭންޑް ކުރަން ކުރަމުން ގެންދާ މަސައްކަތްތަކުގެ މައުލޫމާތު ވެސް ދީފަ އެވެ. އެ ޖަމިއްޔާއިން ހަދާފައިވާ އާ ލޯގޯ އާއި ސްލޯގަން ވެސް މިއަދު ވަނީ ދައްކާލާފަ އެވެ. އާ ސްލޯގަންގެ ގޮތުގައި ތައާރަފުކޮށްފައިވަނީ "އައިއެމް މޯލްޑިވްސް" އެވެ.
