ހަރުކަށި ފިކުރުތަކާ ދެކޮޅަށް ސިފައިންގެ މަސައްކަތް ވަރުގަދަ ކުރަން ވެއްޖެ: ޑިފެންސް މިނިސްޓަރު

ހައްދުފަހަނައަޅާފައިވާ ފިކުރުތަކާއި ދިވެހިން ދުރުކުރުމަށް ސިފައިން ގެންގުޅޭ ސްޓްރެޓެޖީތައް ބަދަލުކޮށް އެފަދަ އަމަލުތަކާ ދެކޮޅަށް ކުރާ މަސައްކަތް މިހާރަށްވުރެ ބޮޑަށް ވަރުގަދަ ކުރަންޖެހޭ ކަމަށް ޑިފެންސް މިނިސްޓަރު އާދަމް ޝަރީފް ވިދާޅުވެއްޖެ އެވެ.

ރާއްޖެ އިސްލާމްވި ދުވަހުގެ މުނާސަބާ ފާހަގަކުރުމަށް މިރޭ ސިފައިންގޭގައި ބޭއްވި ޖަލްސާއެއްގައި ވާހަކަފުޅު ދައްކަވަމުން މިނިސްޓަރު އާދަމް ޝަރީފް ވިދާޅުވީ، ރާއްޖެއަކީ އިސްލާމް ދީން ދެކެ ލޯބިވާ ސައްތައިން ސައްތަ މުސްލިމް ރައްޔިތެއް އޮތް ގައުމަކަށް ވާތީ، ދީނީގޮތުން ހިލާފު އުފެދިދާނެ އެއްވެސް ކަމެއް އެއްވެސް ފަރާތަކުން ކޮށްގެން ނުވާނެ ކަމަށެވެ. ބަވަނަ ވަމުންދާ ދުނިޔެއެއްގައި، މުސްލިމުންގެ އަގީދާއާ ދުރު ނުފޫޒުތައް އަބަދުވެސް އަންނަމުންދާނެ ކަމަށް އިޝާރާތްކުރައްވައި މިނިސްޓަރު ވިދާޅުވީ، އެފަދަ ނުފޫޒެއްގައި ދިވެހި ރައްޔިތުން ޖެހުމަކީ ނުރައްކާތެރިކަމެއް ކަމަށެވެ. ދީނީ ކަންކަމުގައި ހިޔާލު އުފެދުމަކީ ރާއްޖޭގައި ދާހިލީ ހަގުރާމައެއް ފެށުމަށް މެދުވެރިވެދާނެ ކަމެއް ކަމަށް މިނިސްޓަރު ވިދާޅުވި އެވެ. މިނިސްޓަރު ވަނީ އެފަދަ ކަންތައްތަކުން ދިވެހިން ދުރުކުރުމަށް ސިފައިންގެ ސަފުތައް ބަދަހި ބައެއްގެ ގޮތުގައި މަސައްކަތް ކޮށްދެއްވުމަށް އެދިވަޑައިގެންފަ އެވެ.

".. އިސްލާމް ދީނަކީ ފުރިހަމަ ދީނެއް ކަމުގައި ވިޔަސް ދީނުގެ އެކި ކަންކަމުގައި ހިލާފު އުފެދުމަކީ ބުއްދީގެ ގޮތުން ބަލާއިރު ގަބޫލުކުރެވޭ ކަމެއް. އެހެންނަމަވެސް އެއިން އެއްވެސް ކަމެއްގެ ތެރެއިން ރާއްޖޭގައި އެއްވެސް ހަމަނުޖެހުމެއް އުފެދުމަކީ، ސިޔާސީ ހަމަނުޖެހުމަށްވުރެ މާ ނުރައްކާތެރި ކަމެއް. އެއީ ދިވެހިންގެ ތެރޭގައި ބައިބައި އުފެދި ދާހިލީ ހަނގުރާމައެއް ފެށިދާނެ ވަރަށް ނުރައްކާތެރި ކަމެއް. އޭގެ ހެކި 2011 ވަނަ އަހަރު އަޅުގަނޑުމެންނަށް ފެނިގެން ދިޔަ. އަޅުގަނޑުމެންެ މެދުގައި ދީނަށް ވަރަށް ބޮޑު ލޮތްބެއް އޮވޭ،" މިނިސްޓަރު ވިދާޅުވި އެވެ.

އެމަނިކުފާނު ވިދާޅުވި ގޮތުގައި، ރާޢްޖެއަށް ލިބޭ އެކި ކާމިޔާބީތަކަށް ހަސަދަވެރިވާ މީހުންނާއި ސަރުކާރާ ދެކޮޅަށް މަސައްކަތްކުރާ ބޭރުގެ ފަރާތްތަކުން ރާއްޖޭގައި ބައިބައިވުން އުފައްދަން އެންމެ ބޮޑަށް ބޭނުންކުރާނެ އެއް ހަތިޔާރަކީ އިސްލާމް ދީނެވެ. ދިވެހިންގެ ޖަޒުބާތު ތަކާއި އެންމެ ފަސޭހައިން ކުޅެލެވޭނީ އިސްލާމް ދީނުގެ ނަމުގައި ކުރާ ކަންކަމުން ކަން ދީނާ އިދިކޮޅު ފަރާތްތަކަށް އެނގޭ ކަމަށާއި އެހެންކަމުން އެކަމަށް ސަމާލުވެތިބުމަށް ވެސް މިނިސްޓަރު ވަނީ އިލްތިމާސްކުރައްވާފަ އެވެ.

ރާއްޖެ އިސްލާމްވީ މީލާދީން 1153 ވަނަ އަހަރު އެވެ. ރާއްޖެއަށް އިސްލާމްދީނުގެ ފިކުރު ގެންނެވި ކަމަށް ބެލެވެނީ އެ ދުވަސްވަރު ރާއްޖެއަށް ވަޑައިގެންނެވި ސައްޔާހެއް ކަމަށްވާ މައުލާނާ އަބުލް ބަރަކާތުލް ބަރުބަރީ އެވެ. ބުނެވޭ ގޮތުގައި އެ ބޭފުޅާ ރާއްޖެއަށް ވަޑައިގެންނެވި އިރު ރާއްޖޭގެ މީހުންނަކީ ބުދަށް އަޅުކަންކުރި ބައެކެވެ. އަދި އޭރުގެ ރަސްކަލަކަށް ހުންނެވީ ވެސް ބުދަށް އަޅުކަންކުރެއްވި ރަސްކަލެކެވެ. އެ ރަސްގެފާނު އިސްލާމްދީން ގަބޫލުފުޅުކުރެއްވީ އަބުލް ބަރަކާތުލް ބަރުބަރީގެ އަތްޕުޅުމައްޗަށެވެ. އޭގެ ފަހުން ހީވެސް ނުކުރާހާ ހަލުވި މިނެއްގައި އިސްލާމްދީން މުޅި ރާއްޖޭގެ އެކި ކަންކޮޅުތަކަށް ފެތުރިގެން ދިޔައެވެ.