ގްރޭޑް އަށެއް ވެސް ދަށު ސާނަވީ ގްރޭޑެއްގެ ގޮތުގައި ހަމަޖައްސަނީ

އަންނަ އަހަރުން ފެށިގެން ގްރޭޑް ހަތަކާއި އަށެއް ދަށު ސާނަވީ ގްރޭޑްގެ ގޮތުގައި ހަމަޖައްސަން އެޑިއުކޭޝަން މިނިސްޓަރީން ނިންމައިފި އެވެ.

އެޑިއުކޭޝަން މިނިސްޓަރީން މިއަދު ބޭއްވި ނޫސްވެރިންގެ ބައްދަލުވުމެއްގައި އެ މިނިސްޓްރީގެ ސްޓޭޓް މިނިސްޓަރު އަހުމަދު ޝަފީއު ވިދާޅުވީ، އާ މަންހަޖުގެ ދަށުން މިދިޔަ އަހަރުން ފެށިގެން އެކި ގްރޭޑް ތަކުގެ ފޮތްތަކަށް ބަދަލުގެންނަމުންދާ ކަމަށެވެ. އަދި އޭގެ ދަށުން ގެންނަ އެންމެ ބޮޑު އެއް ބަދަލަކަށް ވާނީ 2016 ވަނަ އަހަރުން ފެށިގެން ގްރޭޑް ހަތެއް އަދި އަށެއް ދަށު ސާނަވީ ގްރޭޑްގެ ގޮތުގައި ހަމަޖެހިގެން ދިއުން ކަމަށް މިނިސްޓަރު ވިދާޅުވި އެވެ.

އޭރުން ވަކި ސްޓްރީމަކަށް ކުދިން ކިޔަވަން ފަށާނީ ގްރޭޑް ނުވައަކުން ފެށިގެންނެވެ. ގްރޭޑް ހަތެކޭ އެއްގޮތަށް ގްރޭޑް އަށެއް ވެސް ވާނީ، ގްރޭޑް ނުވައެއް ދިހަޔަކަށް ތައްޔާރުވާ ގްރޭޑް ތަކަކަށެވެ.

ޝަފީއު ވިދާޅުވީ، އެގޮތަށް ބަދަލުކުރުމުން ގްރޭޑް އަށަކާއި ހަމަޔަށް ކުދިން ކިޔަވާނީ، 9،10 ގައި ކިޔަވާ ހުރިހާ މާއްދާއެއްގެ ބޭސިކް ކަވާ ކުރެވޭ ގޮތަށް ކަމަށެވެ. އެ ބަދަލު އަންނާނީ އާ މަންހަޖުގެ ދަށުން އަންނަ އަހަރަށް ގެންނަ ބަދަލުތަކާ އެކު ކަމަށް ވާތީ މިއަހަރުގެ ކުދިންގެ ކިޔެވުމަށް އެއްވެސް ބަދަލެއް ނާންނާނެ ކަމަށް ވެސް ޝަފީއު ވިދާޅުވި އެވެ. ގްރޭޑް ހަތެއް އަށެއްގެ ކިޔެވުމަށް އަންނަންއުޅޭ ބަދަލުތަކާއި ބެހޭ ގޮތުން އިތުރު ތަފްސީލު އާންމުންނާ ފަހުން ހިއްސާ ކުރާނެ ކަމަށް އެޑިއުކޭޝަން މިނިސްޓަރީން ވަނީ ބުނެފަ އެވެ.