ޑިފެންސް މިނިސްޓަރުކަމުގެ މަގާމަށް އިއްޔެ އައްޔަން ކުރެއްވި މޫސާ އަލީ ޖަލީލު ޕޮލިސް ކޮމިޝަނަރު ހުސައިން ވަހީދާ މިއަދު ބައްދަލު ކުރައްވައިފި އެވެ.
ފުލުހުން ބުނީ ޝަހީދު ހުސައިން އާދަމް ބިލްޑިންގައި މިއަދު ހަވީރު އޮތް އެ ބައްދަލުވުމަކީ ޑިފެންސް މިނިސްޓަރު ކަމާއި މޫސާ އަލީ ޖަލީލު ހަވާލުވެ ވަޑައިގަތް ފަހުން ޕޮލިސް ކޮމިޝަނަރާ އެކު ފުރަތަމަ ބޭއްވި ބައްދަލުވުން ކަމަށެވެ.
އެ ބައްދަލުވުމުގައި ފުލުހުންނާއި ސިފައިންނާ ދެމެދު އޮންނަ ގުޅުން ވަރުގަދަ ކުރުމާއި ރާއްޖޭގެ ސަލާމަތާއި ރައްކާތެރިކަން ދެމެހެއްޓުމަށް މިހާރަށް ވުރެ ބޮޑަށް މަސައްކަތް ކުރުމާ މެދު މަޝްވަރާ ކޮށްފައިވާ ކަމަށެވެ.
ކުރިން ޗީފް އޮފް ޑިފެންސް ފޯސް ކަން ވެސް ކުރެއްވި މޫސާ އަލީ ޖަލީލަށް ޑިފެންސް މިނިސްޓަރު ކަން ދެއްވުމުގެ ކުރިން އޭނާ ހުންނެވީ ރާއްޖެއިން ޕާކިސްތާނަށް ކަނޑައަޅާ ސަފީރުގެ މަގާމުގަ އެވެ.
ޖަލީލަށް ޑިފެންސް މިނިސްޓަރު ކަން ދެއްވިއިރު ކުރީގެ ރައީސް މުހައްމަދު ނަޝީދުގެ ވެރިކަމުގައި ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ބަންދުކުރި މައްސަލައާ ގުޅިގެން ދައުލަތުން ދައުވާކުރާ ބޭފުޅުންގެ ތެރޭގައި އޭނާ ވެސް ހިމެނިވަޑައިގަންނަވަ އެވެ.