ކިޔަވައިދިނުމުގެ ދާއިރާގައި މަސައްކަތްކުރާ ޓީޗަރުން ތަމްރީން ކުރުމަށް މިއަހަރު ހުރިހާ އަތޮޅެއްގެ ސްކޫލްތައް ވީޑިއޯ ކޮންފަރެންސްގެ ނިޒާމުން ގުޅުވާލާނެ ކަމަށް އެޑިއުކޭޝަން މިނިސްޓަރު ޑރ. އައިޝަތު ޝިހާމް ވިދާޅުވެއްޖެ އެވެ.
ދިރާސީ އަހަރު ފެށުމާ ގުޅިގެން މިނިސްޓަރު އާއިޝަތު ޝިހާމް މިއަދު ދެއްވި ހިތޯބުގައި ވިދާޅުވީ، ޓީޗަރުންގެ އިލްމީ ގާބިލުކަން އިތުރުކުރުމަށް ފާއިތުވި ދެ އަހަރުގެ ތެރޭގައި ގިނަ މަސައްކަތްތަކެއް ކޮށްފައިވާ ކަމަށެވެ. އެގޮތުން ކިޔަވައިދޭ ޓީޗަރުންނަކީ ޑިޕްލޮމާއިން މައްޗަށް ކިޔަވައިގެން ތިބެންޖެހޭ ބައެއްގެ ގޮތުގައި ނިންމައި އެކަން ތަންފީޒުކުރުމަކީ ރާއްޖޭގެ ތައުލީމީ ފެންވަރު މަތިކުރުމަށް އެޅި މުހިއްމު ފިޔަވަޅެއް ކަމަށެވެ.
ކިޔަވައިދިނުމުގެ އާ މަންހަޖުގެ ދަށުން އަލަށް ތައާރަފްކުރި ފޮތްތަކަކީ ރާއްޖޭގެ ތައުލީމީ ނިޒާމަށް ޒަމާނީ ހެޔޮ ބަދަލުތަކެއް ގެނުވާނެ ފޮތްތަކަކަށް ވާނެ ކަމަށް މިނިސްޓަރު ވިދާޅުވި އެވެ. ފޮތްތަކަށް ގެނައި ބަދަލާ އެކު، ފައުންޑޭޝަން ސްޓޭޖުން ފެށިގެން ކީސްޓޭޖް ދެއަކާ އާހަމައަށް ހިމެނޭ ހުރިހާ ގްރޭޑަކަށް އާ މަންހަޖު ފުރިހަމައަށް ތަންފީޒުކުރެވިގެންދާނެ ކަމަށް މނިސްޓަރު އައިޝަތު ޝިހާމް ވިދާޅުވި އެވެ.
" މިއީ އަމިއްލަ ނަފްސަށް އިތުބާރުކުރާ، ޤައުމިއްޔަތަށް ލޯބިހުރި، ދީނީ ކަންކަމަށް ސަމާލުވާ، ދިރިއުޅުމުގެ ހުނަރުތައް އަށަގެންފައިވާ، ބަދަލުވަމުން އަންނަ ދުނިޔެއަކަށް ހޭލުންތެރި، ގާބިލު، ހުނަރުވެރި، ކުދިންތަކެއް ތައްޔާރުކުރުމަށް އެޅިގެންދާ މުހިއްމު ފިޔަވަޅެއް،" މިނިސްޓަރު ވިދާޅުވި އެވެ.
ތައުލީމީ ނިޒާމް ކުރިއަށްވުރެ ހަރުދަނާ ކުރުމުގެ ގޮތުން ޕްރީކޫލްތައް މިނިސްޓްރީގެ ދަށަށް ބަދަލުކޮށް އެތަންތަނަށް ބަދަލު ގެންނަން މިނިސްޓްރީން ކުރެއްވި މަސައްކަތްތައް މިނިސްޓަރު ވަނީ ފާހަގަކުރައްވާފަ އެވެ. އަދި ކުޅިވަރުގެ ރޮނގުން ފާހަގަކުރެވޭ ކާމިޔާބީ ހާސިލްކުރާ ދަރިވަރުންނަށް، މިއަހަރު ތައާރަފްކުރި ކުޅިވަރު ސްކޯލަޝިޕް ތަކަށް އިޝާރާތްކުރައްވައި މިނިސްޓަރު ވިދާޅުވީ، ފަންނު ހުންނަ ކުދިންނަށް އެކުދިންގެ ހުނަރު އިތުރު ކުރުމަށް ބޭރަށް ދެވޭނެ ގިނަ ފުރުސަތުތަކެއް އަންނަ އަނަރުން ފެށިގެން ހޯދައިދޭނެ ކަމަށެވެ.
އެކަމަނާ ވަނީ، ދިރާސީ އަހަރުގެ ހެޔޮ އެދުމާ ތަހުނިޔާ ހުރިހާ ކިޔަވާކުދިންނަށް ވިދާޅުވެފައެވެ. ތައުލީމް އުނގެނުމަކީ ލިބިފައިވާ ނިއުމަތެއް ކަމުގައި ދެކިގެން މިއަހަރަކީވެސް ކާމިޔާބު އަހަރަކަށް ހެދުމަށް މިނިސްޓަރު ވަނީ ހުރިހާ ކިޔަވާ ކުދިންނަށް އިލްތިމާސްކުރައްވާފަ އެވެ.
އެޑިއުކޭޝަން މިނިސްޓަރު ޑރ އައިޝަތު ޝިހާމް --