ބޮޑު ޗުއްޓީ ނިމި ސްކޫލްތަކުގެ ކިޔެވުން މިއަދު ފެށުމާ އެކު ކުރިއެކޭ ވެސް އެއްގޮތަށް އަނެއްކާވެސް ފިހާރަތައް ރޭގަނޑު 10 ޖަހާއިރަށް ބަންދުކުރަން ޖެހޭނެ ކަމަށް އިކޮނޮމިކް މިނިސްޓްރީން ބުނެފި އެވެ.
އެމިނިސްޓްރީން ބުނީ މާދަމާ އިން ފެށިގެން ރޭގަނޑު 10 ޖަހާއިރަށް ފިހާރަތައް ބަންދުކުރަންޖެހޭނެ ކަމަށެވެ. ފިހާރަތައް 11 ޖަހަންދެން ހުޅުވާފާއި ބެހެއްޓުމަށް އިކޮނޮމިކް މިނިސްޓްރީން ހުއްދަ ދިނީ މިދިޔަ މަހުގެ 24 ވަނަ ދުވަހެވެ. އިކޮނޮމިކް މިނިސްޓްރީން ބުނީ 11 ޖަހަންދެން ފިހާރަތައް ހުޅުވާފައި ބަހައްޓަން ހުއްދަ ދިނީ އެ ދުވަސްވަރަކީ ބޮޑު ޗުއްޓީގެ ދުވަސްވަރަށް ވާތީ، ގިނަ ބަޔަކު ބާޒާރު ކުރަން މާލެ އައިސްފައިވާތީ ކަމަށެވެ.
ފިހާރަތައް ހުޅުވާފައި ހުންނަ ވަގުތު އިތުރު ކުރި ނަމަވެސް، ކެފޭ އަދި ރެސްޓޯރަންޓްތައް ހުޅުވާފައި ބެހެއްޓޭ ވަގުތަށް ބަދަލު ގެނެސްފައެއް ނުވެ އެވެ. މީގެ ކުރިން ފިހާރަ އާއި ކެފޭތައް ބަންދު ކުރާ ވަގުތު އަވަސް ކުރީ މާލެ ތެރޭގައި ކުށްކުރުން ގިނަ ވާތީ އެކަން ހުއްޓުވަން އެޅި ފިޔަވަޅެއްގެ ގޮތުންނެވެ. އަދި 24 ގަޑިއިރު ފިހާރަ ކެފޭ އަދި ރެސްޓޯރަންޓް ހިންގުމުގެ ހުއްދަ ދިނުން ވެސް ވަނީ ހުއްޓާލައިފަ އެވެ
