ގަތަރުގެ ހުށަހެޅުމާ އެއްގޮތަށް ފީފާ ވޯލްޑް ކަޕްގެ މެޗުތައް ކުޅޭ އަށް ސްޓޭޑިއަމްގައި ބަނގުރާ ވިއްކުން ފީފާ އިން މަނާކޮށްފި އެވެ.
މެދުއިރުމަތީގެ މުސްލިމް ގައުމު، ގަތަރުގައި ބާއްވާ ވޯލްޑް ކަޕްގައި ވަކި އުސޫލެއްގެ މަތިން ބަނގުރާ ވިއްކޭނެ ކަމަށް ކުރިން އޮތީ ނިންމާފަ އެވެ. މިގޮތުން ސްޓޭޑިއަމްތަކުގެ ބައެއް ސަރަހައްދުތަކުގައި ޓެންޓް ޖަހައިގެން ބަނގުރާ ވިއްކޭނެ ކަމަށް ކުރިން ހުއްދަ ދިނެވެ. އެކަމަކު މި ނިންމުން ފީފާ އިން ބަދަލުކުރީ މުބާރާތް ފެށެން ދެ ދުވަހަށް ވެފައިވަނިކޮށް އިއްޔެ އެވެ.
ބައިނަލްއަގްވާމީ ބޮޑެތި މުބާރާތްތަކުގައި ބަނގުރާ ވިއްކުމުގެ ރައިޓްސް ހޯދާފައިވާ އެއް ކުންފުންޏަކީ ބާޑްވައިޒާ އެވެ. މިފަހަރުގެ ވޯލްޑް ކަޕް ފެށުމުގެ ކުރިން ފީފާ އިން ބަނގުރާ ވިއްކުން މަނާކުރުމުން މަޝްހޫރު ކުންފުނި ބާޑްވައިޒާ އިން ވަނީ އެކަމުގެ ހިތްހަމަނުޖެހުން ފާޅުކޮށްފަ އެވެ. މިގޮތުން ފީފާގެ ނިންމުމާއި ގުޅިގެން ބާޑްވައިޒާ އިން ހިތްހަމަނުޖެހުން ފާޅުކުރި ޓްވީޓެއް އެ ކުންފުނިން ވަނީ ފަހުން ޑިލީޓް ކޮށްލާފަ އެވެ. ރިޕޯޓްތައް ބުނާގޮތުން ފީފާ އިން މިގޮތަށް ނިންމީ ބާޑްވައިޒާގެ ލަފާ ވެސް ހޯދާފަ އެވެ.
ބަނގުރާ މަނާކުރުމާ އެކު ޔޫރަޕްގެ ގައުމުތަކުންނާއި ފުޓްބޯޅަ ސަޕޯޓަރުން އަންނަނީ ގަތަރަށް ފާޑުކިޔަމުންނެވެ. އާސެނަލާއި އިންގްލެންޑުގެ ސަޕޯޓަރެއް ޓްވިޓާގައި އާއްމުކުރި ޕޯސްޓެއްގައި ބުނީ ފުޓްބޯޅަ ބަލާއިރު ބަނގުރާ ބުއިމަކީ އިނގިރޭސިންގެ ސަގާފަތުގައި ހިމެނޭ ކަމެއް ކަމަށާއި އެކަމަކު ބަނގުރާ މަނާކުރިޔަސް އެކަމާ ދެރަނުވާނެ ކަމަށެވެ. ސްޓޭޑިއަމް ތަކުގައި ބަނގުރާ ނުލިބުނަސް އެނޫން އެހެން ތަންތަނުން ބަނގުރާ ލިބޭނެ އިންތިޒާމު ހަމަޖައްސާނެ އެވެ.
ހިތްހަމަނުޖެހުނު ބައެއް ފަރާތްތަކުން ބުނަމުން އަންނަނީ ވޯލްޑް ކަޕަށް ތައްޔާރުވާން ގަތަރަށް 12 އަހަރު ލިބުނުއިރު ފަހު ވަގުތު ބަނގުރާ މަނާކުރުމުން ކަންބޮޑުވާ ކަމަށެވެ.
ވޯލްޑް ކަޕަށް ތައްޔާރުވަމުން އައިއިރު ގަތަރުން ވަނީ އިސްލާމީ ރިވެތި އުސޫލުތައް ދޫނުކުރާނެ ކަމަށް ބުނެފަ އެވެ. މިގޮތުން ވޯލްޑް ކަޕަށްޓަކައި ދީނުގެ ކަންކަން ބަދަލުކުރަން ހުއްދަ ނުދޭނެކަމަށް އެގައުމުން އައީ ތަކުރާރުކޮށް ބުނަމުންނެވެ. ގަތަރުން މަނާކޮށްފައިވާ އަނެއް ކަމަކީ އެއްޖިންސުން ގުޅުން ހިންގުމުގެ ކެމްޕޭން ޕްރޮމޯޝަން ހުއްޓުވުމެވެ.
"އަހަރެމެންނަކަށް ގާނޫނެއް ބަދަލެއް ނުކުރެވޭނެ. ވޯލްޑް ކަޕަށް ޓަކައި 28 ދުވަހަށް އަހަރެމެންނަކަށް ދީން ބަދަލު ނުކުރެވޭނެ" ގަތަރުގެ މޭޖަ ޖެނެރަލް އަބްދުލް އަޒީޒް އަބްދުﷲ މީގެ ކުރިން ދެއްވި އިންޓަވިއުއެއްގައި ވިދާޅުވެފައިވެ އެވެ.