ނިޝާން އިއްޒުއްދީންގެ އިއްޒަތުގެ ވެރިޔާ އަބްދުއްރަޝީދު ހުސައިން (އަބްސީ) ލިޔުއްވާފައިވާ "އެހާރުގެ ބައެއް ހަނދާން"ގެ ނަމުގައި ފޮތެއް ނެރެފި އެވެ.
ލިޔުންތެރިންގެ ގުޅުމުން މިއަދު ބޭއްވި ހާއްސަ ހަފްލާއެއްގައި މި ފޮތް ނެރެދެއްވީ ލިޔުންތެރިންގެ ގުޅުމުގެ ރައީސް އަދި ނިޝާން އިއްޒުއްދީންގެ އިއްޒަތުގެ ވެރިޔާ އައްބާސް އިބްރާހިމް އެވެ.
އަބްދުއްރަޝީދު ލިޔުއްވާފައިވާ އެހާރުގެ ބައެއް ހަނދާން ފޮތަކީ ދިވެހި ތާރީހަށް މުހިއްމު ފޮތެެކެވެ. މި ފޮތުގައި މީލާދިން 19 ވަނަ ގަރުނުގެ ކުރީކޮޅާއި ފަހުކޮޅު ރާއްޖެއަށް ޒިޔާރާތްކުރި މީހުން ލިޔެފައިވާ ލިޔުންތަކާ ހަވާލާދީ ރާއްޖޭގެ ވިޔަފާރިއަށް އައިސްފައިވާ ބަދަލުތަކާއި ރާއްޖޭގެ ތަރައްގީގެ ބިންގާ އެޅި އެކަން ފެށިގެން ދިޔަ ގޮތް ލިޔުއްވާފައިވެ އެވެ.
މި ހަފްލާގައި ލިޔުންތެރިންގެ ގުޅުމުގެ ރައީސް އައްބާސް އިބްރާހިމް ވަނީ މިފޮތުގެ މުހިއްމުކަން ވަރަށް ބޮޑަށް ފާހަގަކުރައްވާފަ އެވެ. އެގޮތުން އައްބާސް ވިދާޅުވީ ދިވެހިރާއްޖޭގެ ތަރައްގީ އެންމެ ފުރަތަމަ ފެށިގެން ދިޔައިރު އަބްދުއްރަޝީދަކީ އެކަމުގައި ވަރަށް އިސްކޮށް ވަރަށް ގާތުން އުޅުއްވި ބޭފުޅެއް ކަމަށެވެ. އެހެންކަމުން އަބްދުއްރަޝީދަށް އެފަދަ މަންޒަރުތައް އަމިއްލަފުޅަށް ފެނިވަޑައިގެން ފޮތެއްގެ ސިފައިގައި އެ ހުރިހާ ވާހަކަތައް ގެނެސްދީފައިވުމަކީ ފޮތުގެ މުހިއްމުކަން އެންމެ ބޮޑަށް ހާމަވާ އެއް ސަބަބު ކަމުގައިވެސް ވިދާޅުވި އެވެ.
"މިއަދުގެ ޒުވާން ކުދިންނާއި ދަރިވަރުންނަށް މިހާ މުހިއްމު ފޮތެއް ކިޔޭނެ ގޮތް ހަމަޖައްސައި ދެއްވުން އެއީ ވަރަށް މުހިއްމު ކަމެއް،" އައްބާސް ވިދާޅުވި އެވެ.
އައްބާސްގެ ވާހަކަފުޅުގައި ލިޔުންތެރިން އެބޭފުޅުންގެ އެހާރާއި މިހާރުގެ ހަނދާންތައް ރާއްޖެއާ ގުޅުވައިގެން ލިޔުއްވައި ދެއްވުމަށްވެސް އިލްތިމާސް ކުރެއްވި އެވެ. ދިވެހިންނަކީ ކޮން ބައެއްކަމާއި ކިހިނެއް އުޅުނު ބައެއްކަން މިޒަމާނުގެ ކުދިންނަށް އެނގި އެކަންކަމާ މެދު ވިސްނައި ފިކުރު ކުރެވޭނީ އޭރުން ކަމުގައިވެސް ވިދާޅުވި އެވެ. އަދި މިފަދަ މައުލޫމާތުގެ ފޮތްތައް އިތުރަށް ލިޔެ ނެރުމަށްވެސް ބާރުއެޅުއްވި އެވެ.
ލިޔުންތެރިންގެ ގުޅުމުން މައުލޫމާތުދޭ ގޮތުގައި "އެހާރުގެ ބައެއް ހަނދާން" އަޝްރަފީ ބުކްޝޮޕާއި ރައުނޑްވަން ބުކްޝޮޕް އިން މާދަމާއިން ފެށިގެން ގަންނަން ލިބޭނެ އެވެ.