ވިއެޓްނާމްގެ އަވަށަކަށް ހޮނު އަޅާވަރުން މީހުން ދިރިއުޅެން ދަތިވެފައި

އިންސާނުންނަށް ދިރިއުޅެން އުނދަގޫ ވަރަށް ގިނަ ސަރަހައްދުތައް ދުނިޔޭގެ އެކި ކަންކޮޅުތަކުގައި ހުރެ އެވެ. ތަފާތު ގުދުރަތީ ހާދިސާތައް ދިމާވާލެއް ގިނަކަމުންނެވެ. ވިއެޓްނާމްގެ މެދުގައި އޮންނަ އަވަށަކަށް ވެސް ދިމާވެފައިވަނީ މިފަދަ މައްސަލައެކެވެ. ވިއްސާރަ މޫސުމުގައި މި އަވަށަށް އާދަޔާހިލާފަށް ގިނައިން ހޮނުއަޅަ އެވެ. އެހެންވެ އެ އަވަށުގައި ދިރިއުޅުނު އެންމެން ކަހަލަ ގޮތަކަށް މިހާރު އެ އަވަށް ދޫކޮށް ގޮސް އެހެން ހިސާބުގައި ދިރިއުޅެން ވަނީ ފަށާފަ އެވެ.

ވިއެޓްނާމް ނިއުސްގައިވާ މި ޚަބަރުގައި ބުނެފައިވާ ގޮތުގައި ލޯންގް ވޮޓް އަވަށަކީ ވިއެޓްނާމްގެ ސޮން ޓޭ ޑިސްޓްރިކްޓްގައި އޮންނަ އަވަށެކެވެ. މި އަވަށުގެ ގޭގެޔަށް އަހަރަކު އެތައް ފަހަރަކު ހޮނުއަޅައި އެ ގޭގައި ހުންނަ ހުރިހާ އެއްޗެއް ހަލާކުވެ އެވެ.

މި އަވަށަކީ ޖަންގަލީގެ އެންމެ ފުނުގައި ވަރަށް ހަނި މަގަކުން ތިރިއަށް ފައިބަން އޮންނަ ވަރަށް ތިރި އަވަށެކެވެ. އަވަށުގެ ވަށައިގެން އޮންނަނީ އުސް ފަރުބަދަ ތަކެވެ. އަވަށުގެ މީހުން އެހެން އަވަށްތަކަށް ދާން ޖެހެނީ ހަނި މަގުން މައްޗަށް އަރައިގެންނެވެ.

ޑިންހް ވާން ޑިއެމް ކިޔާ އެ އަވަށުގެ ދުވަސްވީ މީހަކު ބުނި ގޮތުގައި ހޮނުއެޅުމުގެ ސަބަބުން އެމީހުން ގެންގުޅޭ ގެރި ބަކަރި ފަދަ ޖަނަވާރުތައް މަރުވެ ގަސްތައް އަނދައިގެން ދެއެވެ. އަދި ހޮނުގެ އަޑުގަދަ ކަމުން އެ އަޑު ދެކެ އަވަށުގެ މީހުން އިންތިހާއަށް އަށް ބިރުގަނެ އެވެ.

"އަހަރެންގެ އަންހެންދަރިފުޅާއި ކާފަ ކުއްޖެއްގެ ގަޔަށް ވެސް މިދިޔަ އަހަރު ހޮނު އެޅި. ނަސީބަކުން އެމީހުން މަރުނުވެ ސަލާމަތްވި،" ދުވަސްވީ މީހާ ބުންޏެވެ.

ގަޔަށް ހޮނުއަޅައިގެން އަނިޔާ ލިބުނު މީހެއްކަމަށްވާ ޑިންގް ތީ ޓްރުއޮންގް ބުނި ގޮތުގައި ހޮނުއެޅިފަހުން އޭނާއަށް ނަފްސާނީ ގޮތުން ބޮޑެތި އުނދަގޫތައް ކުރިމަތިވެފައިވެ ސިއްހަތު ވެސް ވަރަށް ބޮޑަށް ގޯސްވެފައިވާ ކަމަށެވެ. ކޮންމެ ފަހަރަކު ގުގުރީގެ އަޑު އިވޭއިރަށް އޭނާ ބިރުން ގޮސް ކޮޓަރީގެ ކަނަކަށް ވަދެ ފިލާ އިންނަ ކަމަށް އޭނާ ބުންޏެވެ.

އާންމުކޮށް ހޮނުއަޅަނީ އުސް ތަންތަނަށް ކަމަށް ވެފައި މި އަވަށް އޮންނަނީ ޖަންގަލީގެ މެދުގައި ވަރަށް ފަރުބަދަތަކެއްގެ މެދުގައި ވަރަށް އަޑިއަށް ފައިބާ ގޮތަށް ކަމުން އެ އަވަށަށް އެހާ ގިނައިން ހޮނުއަޅާތީ ސައިންސްވެރިން ވެސް ވަނީ ހައިރާންވެފަ އެވެ.

އެ ސަރަހައްދުގެ އެންމެ އިސް ވެރިޔާ ބުނި ގޮތުގައި އެ އަވަށުގައި ދިރިއުޅެން މިހާރު އަވަށު މީހުން ބިރުން އުޅޭތީ އެ ތަނާ ދެ ކިލޯ މީޓަރު ދުރުގައި އޮތް ހިސާބަކަށް އެމީހުން ބަދަލުކުރުމުގެ މަސައްކަތް ކުރަމުންދާ ކަމަށެވެ. އެގޮތުން މިހާތަނަށް 17 ގެއެއްގެ 73 މީހުން އާ އަވަށަކަށް ބަދަލުކޮށްފައިވާ ކަމަށް ވެސް އޭނާ ބުންޏެވެ.