އެއްބައިވަންތަކަމުގެ ދުވަހުގެ މުނާސަބަތުގައި ބާއްވާ ޖަލްސާގައި ބައިވެރިވެވަޑައިގަތުމަށްޓަކައި ރައީސް އިބްރާހީމް މުހައްމަދު ސޯލިހުގެ ދެކަނބަލުން މ. ކޮޅުފުށްޓަށް ވަޑައިގެންފި އެވެ.
އެއްބައިވަންތަކަމުގެ ދުވަހުގެ މުނާސަބާ މިއަހަރު ގައުމީ ފެންވަރުގައި ފާހަގަކުރުމަށް ސަރުކާރުން ނިންމާފައިވަނީ ކޮޅުފުށީގަ އެެވެ.
ރައީސް ސޯލިހްގެ ދެކަނބަލުން ކޮޅުފުށްޓަށް ވަޑައިގަތުމުން މަރުހަބާ ދެންނެވީ ކޮޅުފުށްޓަށް ނިސްބަތްވެވަޑައިގަންނަވާ ހޯމް މިނިސްޓަރު އިމްރާން އަބްދުﷲގެ ދެކަނބަލުންނެވެ. ކޮޅުފުށި ރައްޔިތުންގެ ފަރާތުންވެސް ރައީސް ސޯލިހްގެ ދެކަނބަލުންނަށް ހޫނު މަރުހަބާއެއް ކިޔާފައިވެ އެވެ.
ރައީސްގެ މިދަތުރުފުޅުގައި، ސުނާމީ ކާރިސާގައި ކޮޅުފުށިން ނިޔާވި މީހުންގެ ހަނދާނުގައި ހަދާފައިވާ ހަނދާނީ ބިނާ އިފްތިތާހްކޮށްދެއްވާނެ އެވެ. އަދި އެއްބައިވަންތަކަމުގެ ދުވަހާއި ގުޅިގެން ބާއްވާ ރަސްމީ ޖަލްސާ ރައީސުލްޖުމްހޫރިއްޔާ ޝަރަފްވެރިކޮށްދެއްވުމުގެ އިތުރުން، އެއްބައިވަންތަކަމުގެ ދުވަހުގެ އަތުގުޅާލުމުގައި ބައިވެރިވެވަޑައިގަންނަވާނެ އެވެ.
މީގެ އިތުރުންވެސް މިދަތުރުފުޅުގައި ރައީސުލްޖުމްހޫރިއްޔާ، ކޮޅުފުށީ ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީއާވެސް ބައްދަލުކުރައްވާނެ އެވެ.
ކޮޅުފުށްޓަކީ 2004 ވަނަ އަހަރު ކުރިމަތިވި ސުނާމީ ކާރިސާގައި ރާއްޖޭގައި އެންމެ ބޮޑަށް ގެއްލުން ލިބުނު ރަށްތަކުގެ ތެރޭގައި ހިމެނޭ ރަށެކެވެ.
އެއްބައިވަންތަކަމުގެ ދުވަހުގެ ރަސްމީ އިހްތިފާލުތަކުގައި ބައިވެރިވެވަޑައިގެންނެވުމަށް ކޮޅުފުށްޓަށް ކުރައްވާ ދަތުރުފުޅު ނިންމަވާލެއްވުމަށްފަހު، ރައީސްގެ ދެކަނބަލުން މިއަދު ހަވީރު މާލެ ވަޑައިގަންނަވާނެ އެވެ.