ނެޓްފްލިކްސްގެ "ބްރިޖަޓަން" އަކީ ވަރަށް މަގުބޫލު އަދި ކާމިޔާބުވި ސީރީޒް އެކެވެ. މިއީ ޖޫލިއާ ކުއިންގެ ބްރިޖަޓަން ވާހަކަ ސީރީޒަށް ޝޮންޑާ ރައިމްސް ލިޔުނު ސްކްރިޕްޓަށް ހަދާފައިވާ ސީރީޒެކެވެ.
"ބްރިޖަޓަން"ގެ ޕްރީކުއެލްއެއް ހަދާ ކަމަށް މިދިޔަ އަހަރު ތެރޭ ހަބަރު ފެތުރިފައިވެ އެވެ. މިގޮތުން "ކުއީން ޝާލޮޓް: އަ ބްރިޖަޓަން ސްޓޯރީ"ގެ ނަމުގައި މި ޕްރީކުއެލް ލިމިޓެޑް ސީރީޒެއްގެ ގޮތުގައި ނެޓްފްލިކްސް އިން މިއަހަރު ސްޓްރީމް ކުރާނެ އެވެ.
މި ސީރީޒްގައި ފެންނާނީ ޕްރިންސަސް ޝާލޮޓްގެ ކައިވެނި ކިންގް ޖޯޖްއާ ކުރުމުން ފެށޭ ލޯބީގެ ވާހަކައާއި މަތީ ފަންތީގެ "ސޮސައިޓީ" އަށް އަންނަ ބަދަލު އަދި ކުއީން ޝާލޮޓް ޕަވާ އަށް އަރާ ތަނެވެ.
މި ސީރީޒްގައި ހަގު ކުއީން ޝާލޮޓްގެ ރޯލު އަދާކުރަނީ އިންޑިއާ އަމާޓީފިއޯ އެވެ. އަދި ކިންގް ޖޯޖްގެ ރޯލް ކޮރީ މިލްކްރީސްޓް އަދާކުރާއިރު، "ބްރިޖަޓަން"ގައި ކުއީން ޝާލޮޓްގެ ރޯލް އަދާކުރި ގޯލްޑާ ރޮޝުއެލް އާއި ލޭޑީ އަގަތާ ޑެންބެރީގެ ރޯލް އަދާކުރި އަޖުއާ އެންޑޯ ވެސް މި ސީރީޒްގައި ހިމެނޭނެ އެވެ.