ޝާހިދު ކަޕޫރާއި އަމްރިތާ ރާއޯގެ "ވިވާ" އަކީ ހިންދީ ފިލްމު ބަލާ ގިނަ ބައެއްގެ ފޭވަރިޓް ފިލްމެވެ.
އެ ފިލްމުގައި އަމްރިތާގެ ކޮއްކޮ "ޗުޓްކީ"ގެ ރޯލު ކުޅުނު ކުޑަ އަންހެން ކުއްޖާ އެނގޭ ހެއްޔެވެ؟
އޭނާގެ ނަމަކީ އަމްރިތާ ޕްރަކާޝް އެވެ. "ވިވާ" އަށް ފަހު އަމްރިތާ އެއްގޮތަކަށް ވެސް ސްކްރީނަކުން ނުފެނެ އެވެ. ނަމަވެސް އޭނާ އަކީ ސޯޝަލް މީޑިއާގައި ވަރަށް މަގުބޫލު ޒުވާނެކެވެ.
ދާދިފަހުން އޭނާ އިންސްޓަގްރާމްގައި ޝެއާކުރި ފޮޓޯތަކަކަށް ފޭނުން ވަރަށް ބޮޑު ތަރުހީބެއް ދީފައި ވެއެވެ.
"ވިވާ"ގެ އިތުރުން ޓީވީ ޝޯ "ޕަޓިއާލާ ބޭބްސް"، "ޝަކްތީ – އަސްތިތުވަ ކޭ އެހްސާސް ކީ" އަދި "މަހާކަލީ"ގައި މުހިއްމު ކެރެކްޓާތަކެއް ކުޅުނު އަމްރިތާ މިހާރު ފެންނަނީ އެ ޝޯތަކުގައި އޭނާ ފެނުނު ގޮތާ ވަރަށް ތަފާތުކޮށެވެ.
ކުރީގައި އޭނާ ހުރި ސިފަޔާއި މިހާރު ހުރި ސިފަ ހާސް ބައި ތަފާތެވެ.
އަމްރިތާ ބޮލީވުޑަށް ތައާރަފްވީ 2001ގައި ރިލީޒްކުރި "ތުމް ބިން"ގައި ކުޑަ ކުއްޖެއްގެ ރޯލުންނެވެ.
އޭގެ ފަހުން 2003ގައި "ކޮއި މެރެ ދިލް މެ ހޭ" އަދި 2008 ގައި "އޭކް ވިވާ އޭސާ ބީ" ކުޅެފައި ވެއެވެ. ނަމަވެސް އެންމެ ގިނަ ބަޔަކަށް އޭނާ ފާހަގަކުރެވުނީ 2007ގައި ރިލީޒްކުރި ޑައިރެކްޓަރު ސޫރަޖް ބަރްޖަތިޔާގެ "ވިވާ"ގައި ކުޅުނު 'ޗުޓްކީ'ގެ ރޯލުންނެވެ.