އޯޓީޓީ ޕްލެޓްފޯމަށް ޝާހިދު ކަޕޫރު ތައާރަފުވާ ވެބް ސީރީޒް "ފަރްޒީ" ސްޓްރީމް ކުރަން ފަށާފައިވާއިރު ދުނިޔޭގެ ގިނަ ގައުމުތަކަކުން މި ފިލްމަށް ބޮޑު ތަރުހީބެއް ދަނީ ލިބެމުންނެވެ.
ސައުތު އިންޑިޔާ އެކްޓަރުން ކަމަށްވާ ވިޖޭ ސެތުޕަތީ، ރާޝީ ކަންނާ، ކޭކޭ މެނޮން އަދި އަމޯލް ޕާލޭކަރް މުހިއްމު ރޯލުތައް ކުޅެފައިވާ މި ޝޯގެ އައިއެމްޑީބީ ރޭޓިންގްސް މިހާރު ވަނީ 8.7 އަށް އަރާފަ އެވެ. މިއީ ވަރަށް މަދު ފިލްމެއް އަދި ސީރީޒްއަކަށް ނޫނީ ހޯދޭ ރޭޓިންގްސް އެއް ނޫނެވެ.
އޯޓީޓީ ޕްލެޓްފޯމް ޕްރައިމް ވީޑިއޯ އިން ދުނިޔޭގެ 170 ގައުމެއްގެ މީހުންނަށް މިހާރު މި ސީރީޒް ބަލާލުމުގެ ފުރުސަތު ލިބިފައި ވެއެވެ. އަދި 37 ބަހަކުން މި ސީރީޒް ޑަބްކޮށްފައި ވެއެވެ.
މި ސީރީޒް މިހާރުވެސް ވަނީ ޕްރައިމް ވީޑިއޯގެ އެންމެ ގިނަ މީހުންބެލި 10 ވީޑިއޯގެ ތެރޭގައި ހިމެނިފަ އެވެ. އިންޑިޔާ، އެމެރިކާ، ޔޫކޭ، ކެނެޑާ، ޔޫއޭއީ، ސައޫދީ އަރަބިޔާ، ބަހްރޭން، ސިންގަޕޫރު، އޮސްޓްރޭލިޔާ، ނިއު ޒިލެންޑް އަދި މެލޭޝިޔާގައި މި ސީރީޒް އެންމެ ކުރީގައި ޓްރެންޑްވަމުން އެބަ ދެއެވެ.
މި ސީރީޒް އުފައްދާފައިވަނީ ރާޖް އެންޑް ޑީކޭ ގެ ނަމުގައި ފިލްމު އުފައްދާ ދެ ޑައިރެކްޓަރުންނެވެ.
ސީރީޒް ބެލި ބައެއް މީހުން ބުނި ގޮތުގައި ޝާހިދުގެ މޮޅުކަން މިހާތަނަށް އެމީހުންނަށް ފާހަގަ ކުރެވިފައި ނެތް ނަމަވެސް މި ސީރީޒް ބަލާލުމުން އޭނާއަކީ ކިހާ ކުޅަދާނަ އެކްޓަރެއްކަން ޔަގީން ކުރެވިއްޖެ އެވެ.