ހިނގަމުން މިދާ އޭޕްރީލް މަހުގެ މިހާތަނަށް 84 މީހަކު ކޮވިޑަށް ޕޮޒިޓިވް ވެފައިވާ ކަމަށް ތަފާސްހިސާބުތަކުން ދައްކައިފި އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނާ ގޮތުގައި ރާއްޖޭގައި ކޮވިޑް އަނެއްކާވެސް އިތުރުވާން ފެށީ މިދިޔަ މަހުގެ ފަހުކޮޅުން ފެށިގެންނެވެ.
އެޗްޕީއޭ އިން އެއްކުރާ ތަފާސްހިސާބުތަކަށް ބަލާއިރު މިމަހުގެ މިހާތަނަށް ޕޮޒިޓިވް 84 މީހުންގެ 73 މީހުންނަކީ މާލެ ސަރަހައްދުގައި އުޅޭ މީހުންނެވެ. ހޮސްޕިޓަލްގައި އެޑްމިޓްކޮށްގެން 17 މީހަކަށް ދަނީ ފަރުވާ ދެމުންނެވެ.
ކޮވިޑްގެ އިތުރުން ޑެންގީ ޖެހޭ މީހުންނާއި އަރިދަފުސް ރޯގާ ޖެހޭ މީހުންގެ އަދަދުވެސް ވަނީ އިތުރު ވާން ފަށާފަ އެވެ. އެހެންވެ ރައްކާތެރިކަމުގެ ފިޔަވަޅު އެޅުމަށް އެޗްޕީއޭ އިން ވަނީ އިލްތިމާސްކޮށްފަ އެވެ.
ރާއްޖޭގައި މިދިޔަ ފެބްރުއަރީ މަހު 146 މީހަކަށް ޑެންގީ ޖެހިފައިވާއިރު މިދިޔަ މާޗް އެ އަދަދު މައްޗަށް ގޮސް 169 މީހަކަށް ކޮވިޑް ޖެހުނެވެ.
ތަފާތު ރޯގާ ތަކުގައި 30،628 މީހަކު މިދިޔަ ފެބްރުއަރީގައި ރިޕޯޓްކޮށްފައިވާއިރު މާޗް މަހު އެ އަދަދު ވަނީ 37،969 އަށް އިތުރުވެފަ އެވެ.