ކ. ގުޅިން ފާނަބަސަންދު ޖެހިފައިވާ ބަޔަކު ފެނިއްޖެ އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިކަން ޔަގީންކޮށްދެމުން ބުނީ މިމަހުގެ ތެރޭގައި ގުޅިން 11 މީހަކު ފާނަބަސަންދަށް ޕޮޒިޓިވްވެގެން ރިޕޯޓްކޮށްފައިވާ ކަމަށެވެ. އޭގެ ތެރެއިން ދެ މީހަކަށް އައިޖީއެމްއެޗްގައި އެޑްމިޓުކޮށްގެން ދަނީ ފަރުވާ ދެމުންނެވެ.
މާލެއާ މާދުރު ނޫން ހިސާބެއްގައި އޮންނަ ގުޅި އަކީ ގިނަ އަދަދެއްގެ ފަތުރުވެރިން ޗުއްޓީ ހޭދަކޮށްލުމަށް ދާ ރަށަކަށެވެ.
ފާނަބަސަންދު ޖެހުމުން ގައިގަ ބިހިތަކެއް ނަގައި ބިހިތައް ހުންނަ ތަންތަން ވަރަށް ބޮޑަށް ހިރުވަ އެވެ.
ފާނަބަސަންދު ޖެހިފައިވާ މީހެއްގެ ހަމުގައި ޖެހުމުންނާއި، އެފަދަ މީހަކާ ގައިގޯޅިވުމުންނާއި، އެފަދަ މީހަކު އަތްލާ އެއްޗެއްގައި އަތްލެވުމުންނާއި އަދި އެފަދަ މީހަކު ބޭނުންކުރާ އަންނައުނު ބޭނުންކުރުމުންވެސް މިބަލި ޖެހިދާނެ އެވެ.
ފާނަބަސަންދަކީ ހަލުއިކޮށް ފެތުރޭ އަދި ގައިންގަޔަށް އަރާ ބައްޔަކަށް ވާތީ ސަމާލުވުމަށްވެސް އެޗްޕީއޭ އިން އިލްތިމާސް ކުރެ އެވެ.