ފޮރިން މިނިސްޓަރ އަބްދުﷲ ޝާހިދު ރަސްމީ ދަތުރުފުޅެއްގައި ސާބިއާއަށް ވަޑައިގެންފި އެވެ.
ޝާހިދު މިއަދުން ފެށިގެން އަންނަ ބުދަ ދުވަހުގެ ނިޔަލަށް ސާބިއާއަށް ކުރައްވާ މިދަތުރުފުޅުގައި ފަސް އެއްބަސްވުމުގައި ސޮއި ކުރެއްވުމަށް ހަމަޖެހިފައިވެ އެވެ.
ސޮއި ކުރެއްވުމަށް ހަމަޖެހިފައިވާ އެއްބަސްވުންތަކުގެ ތެރޭގައި ހިމެނެނީ ވިސާއާ ގުޅޭ އެއްބަސްވުމަކާއި، ދެ ގައުމުގެ ދެމެދުގައި ވިޔަފާރިއާއި އިންވެސްޓްމަންޓް އަދި އިގްތިސާދީ ދާއިރާއިން ގުޅުން ބަދަހިކުރުމާ ގުޅޭ އެއްބަސްވުމަކާއި، ވައިގެ ދަތުރުފަތުރާ ގުޅޭ އެއްބަސްވުމަކާއި، ޑިޕްލޮމެޓިކް ދާއިރާއިން ތައުލީމުގެ ފުރުސަތުތައް ފަހިކުރުމުގެ އެއްބަސްވުމެއްގެ އިތުރުން ކުޅިވަރުގެ ދާއިރާއިން ފުރުސަތުތައް ފަހިކުރުމުގެ އެއްބަސްވުމެކެވެ.
ޝާހިދުގެ މިދަތުރުފުޅުގައި ސާބިއާގެ ފަސްޓް ޑެޕިއުޓީ ޕްރައިމް މިނިސްޓަރު އަދި މިނިސްޓާ އޮފް ފޮރިން އެފެއާޒް އިވިއްސާ ޑޭސިކްއާ ބައްދަލުކުރެއްވުމަށްވެސް ހަމަޖެހިފައިވެ އެވެ.
ޝާހިދު ވަނީ މިދިޔަ އަހަރުގެ ނޮވެމްބަރު މަހުވެސް ސާބިއާއަށް ވަޑައިގެން ރަސްމީ މަޝްވަރާތަކެއް ކުރައްވާފަ އެވެ.