ޕީޕަލްސް ކަޕްގައި މިރޭ މާޒިޔާ ސްޕޯޓްސް އެންޑް ރެކްރިއޭޝަނާއި މެލޭޝިއާގެ ޕީޑީއާރްއެމް ބައްދަލުކުރި މެޗު 2-2 އިން އެއްވަރުވެ، ދެ ޓީމުން ވެސް ފައިނަލްގެ އުންމީދު އާކުރިއިރު، މި ނަތީޖާއާއެކު ނިއު ރޭޑިއަންޓަށް ވަނީ މުބާރާތުން އަލްވަދާއު ކިޔަން ޖެހިފަ އެވެ.
މި މުބާރާތުގެ ލީގު ބުރުގައި ކޮންމެ ޓީމަކަށް ވެސް ބާކީ އެއް މެޗު އޮތްއިރު، ފައިނަލްގެ ފުރުސަތު އޮތީ މާޒިޔާ އާއި ޕީޑީއާރްއެމް އަދި ސިންގަޕޯ ލަޔަންސްއަށެވެ. ލަޔަންސް ވަނީ މި މުބާރާތުގައި މިއަދު ހަވީރު ކުޅުނު މެޗުގައި ނިއު އަތުން 3-1 އިން މޮޅުވެފަ އެވެ.
މެޗުގެ 21 ވަނަ މިނިޓުގައި މާޒިޔާ އިން އުފެއްދި ކައުންޓާ އެޓޭކެއްގައި ހުސެއިން ނިޔާޒް މުހައްމަދު (ބޮކުރީ) ހުރަސްކޮށްލި ބޯޅަ ގޯލުގެ ތެރެއަށް އަމާޒުކޮށް، މާޒިޔާ އަށް ލީޑު ހޯދައިދިނީ ސްޕެއިންގެ ފޯވަޑް ޕަބްލޯ ރޮޑްރިގޭޒް އެވެ.
އެކަމަކު މެޗުގެ 42 ވަނަ މިނިޓުގައި ޕީޑީއާރްއެމްގެ މާލީ ފޯވަޑް ޑްރަމާނޭ ޓްރާއޯރޭ ވަނީ ލަނޑެއް ޖަހައި، މެޗުގެ ނަތީޖާ އެއްވަރުކޮށްފަ އެވެ. މާޒިޔާގެ ޕެނަލްޓީ އޭރިޔާ ތެރެއަށް ޕީޑީއާރްއެމްގެ ކުޅުންތެރިއެއް ހުރަސްކޮށްލި ބޯޅަ ދިފާއުކުރަން މާޒިޔާގެ އަމްދާން އަލީ (އެންޑީ) އާއި ގޯލްކީޕަރު އިމްރާން މުހައްމަދު އެރި ނަމަވެސް، ޓްރައޯރޭ ވަނީ ބޮލުން ގޯލަށް ބޯޅަ އަމާޒުކޮށްލައިފަ އެވެ.
މެޗުގެ ފުރަތަމަ ހާފު ނިމެން އުޅެނިކޮށް، މާޒިޔާ އަށް ލިބުނު ޕެނަލްޓީއެއް ޕަބްލޯ ވަނީ ބޭކާރުކޮށްލައިފަ އެވެ. މާޒިޔާގެ ކެޕްޓަން އަސަދުﷲ އަބްދުﷲ އަށް ޕީޑީއާރްއެމްގެ ޑިފެންޑަރު ކުގެގްބޭ އޮނޮރިއޯޑޭ ކުރި ފައުލަކާ ގުޅިގެން ލިބުނު ޕެނަލްޓީ ޕަބްލޯ ފޮނުވާލީ ގޯލުގެ ހުރަސް ދަނޑި މަތިންނެވެ.
މެޗުގެ 60 ވަނަ މިނިޓުގައި މާޒިޔާ އަށް އަލުން ލީޑު ހޯދައިދިނީ ޕަބްލޯ އެވެ. ހިލޭ ޖެހުމަކުން ބޮކުރީ ޕެނަލްޓީ އޭރިޔާ ތެރެއަށް ހުރަސްކޮށްލި ބޯޅަ ޕަބްލޯ ގޯލަށް އަމާޒުކޮށްލީ ބޮލުންނެވެ. މިއީ މި މުބާރާތުގައި ޕަބްލޯ ޖެހި ތިން ވަނަ ލަނޑެވެ.
އެކަމަކު އޭގ ދެ މިނިޓު ފަހުން ޓްރައޯރޭ ވަނީ ލަނޑެއް ޖަހައި، ދެވަނަ ފަހަރަށް މެޗުގެ ނަތީޖާ އެއްވަރުކޮށްފަ އެވެ. މާޒިޔާގެ ބަލްގޭރިއާގެ ޑިފެންޑަރު ޒިވްކޯ ކައިރިން ދެމިގަތުމަށް ފަހު، ޓްރައޯރޭ ވަނީ ތިރިތިރިން ގޯލަށް ބޯޅަ އަމާޒުކޮށްލައިފަ އެވެ.
ޕީޑީއާރްއެމް އަށް ކުޅެމުންދާ ރާއްޖޭގެ ގައުމީ ޓީމުގެ ކެޕްޓަން އަލީ އަޝްފާގް (ދަގަނޑޭ) އަށް މި މެޗުގައި ވެސް ލަނޑެއް ޖެހޭ ގޮތެއް ނުވި އެވެ. މެޗުގެ ފުރަތަމަ ހާފުގައި މާޒިޔާގެ ޑިފެންސް ފޫއަޅުވާލުމަށް ފަހު، ދަގަނޑޭ ތިރިތިރިން ފޮނުވާލި ޝޮޓް ދިޔައީ ދަނޑި ކައިރިން ބޭރަށެވެ. އަދި މެޗުގެ 72 ވަނަ މިނިޓުގައި ދަގަނޑޭ ފޮނުވާލި ހަމަލާ މާޒިޔާގެ ކީޕަރު އިމްރާން ވަނީ ދިފާއުކޮށްފަ އެވެ.