ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި މޯލްޑިވްސް ސޮކަ މޭޓްސް (އެމްއެސްއެމް) ގުޅިގެން ބާއްވާ ދިވެހި ޔޫތު ލީގު 2024ގެ ކުޅުން ފަށައިފި އެވެ.
މި މުބާރާތުގައި 12 އަހަރުން ދަށް، 14 އަހަރުން ދަށް އަދި 16 އަހަރުން ދަށުގެ އުމުރުފުރާތަކަށް ބަހާލައިގެން، ކޮންމެ އުމުރުފުރާއަކުން 8 ޓީމު ވާދަކުރެ އެވެ.
މުބާރާތުގެ މެޗުތައް ކުރިއަށްދާނީ ހެންވޭރު ދަނޑާއި، ހުޅުމާލެ ސްޓޭޑިއަމް އަދި ގަލޮޅު ދަނޑު ގައެވެ. މި މުބާރާތް ނިމުމަށް ހަމަޖެހިފައިވަނީ އަންނަ އަހަރުގެ ޖެނުއަރީ އެއްވަނަ ދުވަހު އެވެ.
މުބާރާތުގެ ފުރަތަމަ ދުވަހު 12 އަހަރުން ދަށުގެ އުމުރުފުރާގައި ކުޅުނު މެޗުގައި ޓީސީ ސްޕޯޓްސް ކުލަބުން ވަނީ ޔުނައިޓެޑް ވިކްޓަރީ (ޔޫވީ)ގެ މައްޗަށް 7-0 އިން މޮޅުވެފަ އެވެ. ހަމަ މި އުމުރުފުރާގައި ކުޅުނު އަނެއް މެޗުގައި ވިކްޓަރީ ސްޕޯޓްސް ކުލަބުން ވަނީ ކުލަބު ވެލެންސިއާގެ 2-0ގެ ނަތީޖާއަކުން ބަލިކޮށްފަ އެވެ.
ސާދަ އަހަރުން ދަށުގެ އުމުރުފުރާގައި ކުޅުނު މެޗުތަކުގައިވެސް ޓީސީ އާއި ވިކްޓަރީން ވަނީ ކާމިޔާބު ހޯދާފަ އެވެ. މިގޮތުން ޓީސީން ޔޫވީގެ މައްޗަށް 6-0 އިން މޮޅުވިއިރު، ވިކްޓަރީން ވަނީ ވެލެންސިއާގެ މައްޗަށް 5-1 އިން މޮޅުވެފަ އެވެ.
މި މުބާރާތުގައި ވާދަކުރާ އެހެން ޓީމުތަކުގެ ތެރޭގައި ކުލަބު އީގަލްސް އާއި، މާޒިއާ ސްޕޯޓްސް އެންޑް ރެކްރިއޭޝަނާއި، ސުޕަ ޔުނައިޓެޑް ސްޕޯޓްސް (ސަސް) އަދި ހުއްރިއްޔާ ސްޕޯޓްސް ކުލަބު ހިމެނެ އެވެ.
ފުރަތަމަ ދުވަހުގެ މެޗުތަކުގައި ޓީސީ ސްޕޯޓްސް ކުލަބުން ފާހަގަކޮށްލެވޭ ކުޅުމެއް ދައްކާފައިވާއިރު، ވިކްޓަރީ ސްޕޯޓްސް ކުލަބުވެސް ވަނީ ދެ އުމުރުފުރާއިން މޮޅުވެފަ އެވެ.