"ދަ ޑިމޮކްރެޓްސް" ޕާޓީ އުފެއްދުމަށް ބާއްވަންޖެހޭ ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަނުން މިއަދު ދީފި އެވެ.
އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު މިއަދު ކުރެއްވި ޓްވީޓެއްގައި ވިދާޅުވީ "ދަ ޑިމޮކްރެޓްސް"ގެ ނަމުގައި ސިޔާސީ ޕާޓީއެއް އުފެއްދުމަށް ޖަލްސާ ބޭއްވުމުގެ ހުއްދަ ދިނުމަށް އިލެކްޝަންސް ކޮމިޝަނުން މިއަދު ނިންމިކަން ޕާޓީ އުފެއްދުމަށް އެދިވަޑައިގަތް ހަސަން ލަތީފަށް އަންގަވާފައިވާ ކަމަށެވެ.
"ދަ ޑިމޮކްރެޓްސް"ގެ ނަމުގައި ޕާޓީ އުފެއްދުމުގެ ހުއްދައަށް އެދި، މޭ 21 ވަނަ ދުވަހު އިލެކްޝަންސް ކޮމިޝަނަށް ހުށަހެޅީ ޕާޓީގެ މުއައްސިސް އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފުގެ ނަމުގަ އެވެ.
ޕާޓީ އުފެއްދުމުގެ ހުއްދަ ދިނުމާ އެކު ދަ ޑިމޮކްރެޓްސްގެ މެންބާޝިޕް ފޯމު ފުރުމުގެ މަސައްކަތް ޕާޓީ ރަޖިސްޓްރީކުރަން 3،560 ފޯމު އިލެކްޝަންސް ކޮމިޝަނަށް ހުށަހެޅީ މިމަހުގެ ފުރަތަމަ ދުވަހު އެވެ.
ޑިމޮކްރެޓުންނަށް ޖަލްސާ ބޭއްވުމުގެ ހުއްދަ ދީފައިވާއިރު މީގެ ކުރިން އިލެކްޝަންސް ކޮމިޝަންގެ މެންބަރުންގެ މެދުގައި ހިޔާލު ތަފާތުވުން އުފެދި މިވަގުތު ރާއްޖޭގައި ތިއްބެވި ހަތަރު މެންބަރުންނަށް ޖަލްސާތައް ކުރިއަށް ނުގެންދެވިގެން ޕާޓީއަށް ރަޖިސްޓްރީ ދޫކުރުން ހުއްޓުނެވެ.
އެއާއެކު ދަ ޑިމޮކްރެޓްސްގެ މުއައްސިސް ހަސަން ލަތީފު ވަނީ އެ ޕާޓީ ރަޖިސްޓްރީ ކުރަން ދަތިކުރަނީ އެ ޕާޓީން ރިޔާސީ ކެންޑިޑޭޓެއް ނެރެން މަސައްކަތް ކުރާތީ ކަމަށް ތުހުމަތުކޮށްފަ އެވެ.