- ލީޑަރުން މިނިވަން ނުކޮށް އިންތިހާބު އިންސާފުވެރިއެއް ނުވާނެ
- ފިޔަވަޅު އެޅުމަށް ވުރެ ބަލަނީ ކަންކަން އިސްލާހު ކުރަން
- މަޝްވަރާ ކުރަން ޖެހެނީ ސީދާ ލީޑަރުންގެ މެދުގައި
ރާއްޖޭގެ ސިޔާސީ މަސްރަހުގައި އުފެދިފައިވާ ހަލަބޮލިކަން ކުޑަކޮށް، 2018 އިގެ އިންތިހާބު އިންސާފުވެރި އިންތިހާބަކަށް ހަދަން ސިޔާސީ ލީޑަރުން މިނިވަންކޮށް ހުރިހާ ޕާޓީތައް އެކުގައި މަޝްވަރާކޮށް ހައްލުތައް ހޯދަންޖެހޭ ކަމަށް ރާއްޖެ ޒިޔާރާތްކުރި އީޔޫގެ ވަފުދުން ބުނެފި އެވެ.
ރާއްޖެއަށް ޒިޔާރާތް ކުރި ވަފުދުގެ ބޭފުޅުން ހޮޓެލް ޖެންގައި މިއަދު ނޫސްވެރިންނާ ބައްދަލުކުރައްވައި ވިދާޅުވީ، ރާއްޖޭގެ މިހާރުގެ ސިޔާސީ މަސްރަހު ކުރިއަށްދާ ގޮތުން ކަން ބޮޑުވާ ކަމަށާއި ކަންކަން ހުރި ގޮތުން އިންސާފުވެރި އިންތިހާބެއް 2018 ވަނަ އަހަރު ބޭއްވިދާނެ ކަމަށް ގަބޫލް ނުކުރައްވާ ކަމަށެވެ. އެކަންކަމަށް ހައްލު ހޯދޭނީ ހުރިހާ ސިޔާސީ ލީޑަރުން ގުޅިގެން މަޝްވަރާ ކޮށްގެން ކަމަށާއި ބަންދުކޮށްފައިވާ ސިޔާސީ ލީޑަރުން އެކަމަށްޓަކައި މިނިވަންކުރަންޖެހޭ ކަމަށެވެ.
އެ ވަފުދުގެ ބޭފުޅުން ވިދާޅުވީ ރާއްޖޭގެ ޝަރުއީ ދާއިރާގައި ގިނަ މައްސަލަތަކެއް އެބަހުރި ކަމަށާއި، ހިޔާލު ފާޅުކުރުމުގެ މިނިވަންކަން ރާއްޖޭގައި ހަނިވެފައިވާ ކަމަށެވެ. އެ ގޮތުން ވަފުދުގެ ނައިބު އަދި އީޔޫގެ ގާނޫނު ހަދާ މަޖިލީހުގައި އިނގިރޭސި ލޭބަ ޕާޓީ ތަމްސީލް ކުރައްވާ ރިޗާޑް ހޮވިޓް ވިދާޅުވީ، ސިޔާސީ ލީޑަރުން ގުޅިގެން ކުރާ މަޝްވަރާތަކުން މައްސަލަތައް ހައްލުކުރެވޭނެ ކަމަށެވެ.
"އެގޮތަށް މަޝްވަރާއެއް ނުކުރެވޭނެ ސިޔާސީ ލީޑަރުން ހައްޔަރުގައި ބައިތިއްބައިގެނެެއް. މަޝްވަރާ ކުރާނަމަ ލީޑަރުން ތިބެންޖެހޭނީ މިނިވަންކޮށް. ހުރިހާ ލީޑަރުން ތިބެންޖެހޭނީ އެއް މޭޒެއްގައި. އާންމުންނަށް އެ ބައްދަލުވުންތަކުގެ ހަބަރު ވަގުތުން އެނގެން ޖެހޭނެ. މިގޮތަށް ކަންކަން ނުކޮށްފިނަމަ އަންނަ 2018 ގެ އިންތިހާބު މިނިވަން އިންސާފުވެރި އިންތިހާބަކަށް ހެދޭނެ އެއްވެސް ފުރުސަތެއް ނެތް،" ރިޗާޑް ވިދާޅުވި އެވެ.
ރިޗާޑް ވިދާޅުވި ގޮތުގައި ފުރަތަމަ ފިޔަވަޅު އެޅުމުގެ ސިޔާސަތަކީ އީޔޫއިން ގަބޫލުކުރާ ސިޔާސަތެއް ނޫނެވެ. ފިޔަވަޅު އެޅުމާ ބެހޭގޮތުން ފުރަތަމަ ބޭއްވި ބައްދަލުވުމުގައި އެކަމަށް ތާއީދުކުރުމާބެހޭ މަޝްވަރާއެއް ނުކުރާ ކަމަށާއި އެކަމަކު ދެވަނަ ބައްދަލުވުމުގައި އެކަމަށް އީޔޫ ޕާލިމެންޓުން ތާއީދު ކުރި ކަމަށެވެ. އެގޮތަށް ތާއީދު ކޮށްފައިވަނީ ރާއްޖެއާއި މެދު ފިޔަވަޅު އަޅަންޖެހޭ ކަންކަން ހުރި ކަމަށް އީޔޫ ޕާލިމެންޓަށް ގަބޫލުކުރެވޭތީ ކަމަށެވެ. އެހެންކަމުން ރާއްޖެއަށް އެންމެ ފައިދާވާނީ ފިޔަވަޅު އަޅާ ބަޔަކަށް ފުރުސަތު ދީގެން ގޮތުގައި ތިބުމަށްވުރެ ބޮޑަށް، ފިޔަވަޅު އަޅަން ގޮވާލާ ސަބަބުތައް ހުއްޓުވައިގެން ކަމަށް ވެސް ރިޗަޑް ވިދާޅުވި އެވެ.
އަދި ވިދާޅުވީ، އީޔޫ އިން ކަންބޮޑު ވަނީ ރައީސް މުހައްމަދު ނަޝީދު ޖަލަށްލައިގެން ނޫން ކަމަށާއި ނަޝީދުގެ މައްސަލާގައި ފުރިހަމަ ނުވާ އެތަކެއް ގާނޫނީ އިޖުރާއަތުތަކެއް ހުރުމާއި ރާއްޖޭގެ ޖުޑިޝަރީ ސިޔާސީ ހަތިޔާރަކަށް ސަރުކާރުން ބޭނުންކުރާ ކަމަށް ގަބޫލުކުރެވޭތީ ކަމަށެވެ.
"އީޔޫ އިން ސަޕޯޓު ކުރަނީ ވަކި ބަޔަކަށް، ވަކި މީހަކަށް ނޫން. އަޅުގަނޑުމެން ބޭނުންވަނީ ރާއްޖޭގެ ހުރިހާ ސިޔާސީ ޕާޓީތަކުގެ އަޑު އަހަން. ދިމާވާ ގޮންޖެހުންތަކުގެ ވާހަކަތައް އަޑު އަހަން. އެހެން ނަމަވެސް އަޅުގަނޑުމެން ބޭނުންވަނީ މި ރާއްޖޭގައި ޑިމޮކްރަސީ ދެމިއޮތުމަށް. ފިޔަވަޅު އެޅުމަކީ ފަސޭހަ ކަމެއް ނޫން. އެކަމަކު ފިޔަވަޅު އަޅަން ބަޔަކު ގޮވާލާނަމަ އެއީ ކަމެއްގެ ސީރިއަސް މިންވަރު ދައްކުވައިދޭ ސިޔާސީ އިޝާރާތެއް. އެހެންކަމުން އަޅުގަނޑުމެން މި ހުށަހެޅި ކަންކަން ރާއްޖޭގެ ސަރުކާރުން ގަބޫލުކުރާނެ ކަމަށް އުންމީދު ކުރަން،" ރިޗަޑް ވިދާޅުވި އެވެ.