ވެރިކަން ކުރާ ކޯލިޝަންގެ މައި ޕާޓީ -- އެމްޑީޕީގެ މައި އޮފީސް އެހެން އިމާރާތަކަށް ބަދަލުކޮށްފި އެވެ.
އެމްޑީޕީގެ އޮފީސް އެންމެ ފަހުން ހިންގީ ސޯސަންމަގުގައި ހުންނަ ހ. ޝަރާޝާ ގައެވެ.
އެމްޑީޕީގެ މައި އޮފީސް މިހާރު ހިންގަމުން ގެންދަނީ ލިލީމަގުގައި ހުންނަ ޕާކިސްތާނުގެ އެމްބަސީ ކައިރީގައިވާ ގ. ނިޔުޝާގެ ދެވަނަ ފަންގިފިލާ ގައެވެ.
އެމްޑީޕީގެ އޮފިޝަލަކު ވިދާޅުވީ ޕާޓީގެ މައި އޮފީސް އާ އިމާރާތަކަށް ބަދަލުކުރި ނަމަވެސް ކުރިން އޮފީސް ހިންގި ތަންވެސް އަދި ބޭނުންކުރާނެ ކަމަށެވެ. އާ އިމާރާތަކަށް ބަދަލުވީ ޕާޓީގެ މަސައްކަތްތައް ވަރަށް ބޮޑަށް އިތުރުވުމާ ގުޅިގެން ޖާގަ ބޮޑު ތަނެއް ބޭނުންވާތީ ކަމަށްވެސް ވިދާޅުވި އެވެ.
"އެނގިވަޑައިގަންނަވާނެ މިއީ ރިޔާސީ އިންތިހާބުގެވެސް އަހަރު. ވަރަށް ގިނަ މީހުން ވެސް ޕާޓީއަށް ވަދެ ނިކުމެ ހަދާނެ. އަދި ތަފާތު ބައްދަލުވުންތައް ބާއްވަންޖެހޭ. މިހުރިހާ ކަމަކަށް ބަލާފައި އިތުރު ތަނެއް ހޯދީ،" އޭނާ ވިދާޅުވި އެވެ.
އާޓިފިޝަލް ބީޗު ކުރިމައްޗަށްވާ ގޮތަށް ހުރި އެމްޑީޕީގެ މައި ހަރުގެ ވެސް މިހާރު ވަނީ އަލަށް އުފައްދަން މަސައްކަތް ކުރާ "ދަ ޑިމޮކްރެޓްސް"ގެ ތަނަކަަށް ހަދާފަ އެވެ. ދަ ޑިމޮކްރެޓްސް އަކީ އެމްޑީޕީން ވަކިވި އިސް ބޭފުޅުންތަކެއް އުފައްދަން މަސައްކަތް ކުރާ ޕާޓީ އެކެވެ.