ރައްޔިތުންގެ މަޖިލީހުގެ ރައީސް މުހައްމަދު ނަޝީދު "ދަ ޑިމޮކްރެޓްސް" އަށް ސޮއިކުރައްވައިފި އެވެ.
އެމަނިކުފާނު މިރޭ ޑިމޮކްރެޓްސްއަށް ސޮއި ކުރެއްވީ އެކަމަށް ހާއްސަކޮށްގެން މިރޭ އާޓިފިޝަލް ބީޗްގައި ބޭއްވި ހާއްސަ ޖަލްސާއެއް ގައެވެ.
ދަ ޑިމޮކްރެޓްސް އުފެއްދުމުގެ ގޮތުން ބާއްވަން ޖެހޭ ޖަލްސާ މިމަހުގެ ފަސްވަނަ ދުވަހުގެ ރޭ ބޭއްވިއިރު އެ ޖަލްސާގެ ޝަރަފް މެހްމާނަކީ ވެސް ރައީސް ނަޝީދު އެވެ. ޑިމޮކްރެޓުންނާ ގުޅިވަޑައިގަންނަވާނެ ކަމަށް ރައީސް ނަޝީދު އިއުލާންކުރެއްވީ އެ ޖަލްސާ ގައެވެ.
ރައީސް ނަޝީދު އިސްވެ ހުންނަވައިގެން އުފެއްދެވި އެމްޑީޕީގެ ރައީސް ކަމުންނާއި އެ ޕާޓީގެ އާންމު މެންބަރު ކަމުން ރައީސް ނަޝީދު އިސްތިއުފާ ދެއްވީ މިދިޔަ ޖޫން 21 ވަނަ ދުވަހު އެވެ.
ދަ ޑިމޮކްރެޓްސް އިން ވަނީ ކުރިއަށް އޮތް ރިޔާސީ އިންތިހާބުގައި އެ ޕާޓީގެ ކެންޑިޑޭޓަކު ވާދަކުރާނެ ކަމަށް ބުނެފަ އެވެ. ބައެއް ބޭފުޅުން ވިދާޅުވާ ގޮތުގައި އެ ބޭފުޅަކީ ރައީސް ނަޝީދު އެވެ.
