ފުލުހުންގެ ބޮޑެތި ތަހުގީގުތަކަށް ހާއްސަކޮށްގެން ހ. ފޯވިންޑުގައި ހަދަމުންދިޔަ އިމާރާތުގެ މަސައްކަތް ނިންމައި، އެ އިމާރާތް ރަސްމީކޮށް މިއަދު ހުޅުވައިފި އެވެ.
އިމާރާތް ހުޅުވީ ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގުގެ ނަމުގައެވެ. އާދަމް ހަލީމަކީ ކުށްވެރިޔަކު ހުއްޓުވަން އުޅުމުން ވަޅި ހަރައި ޖުލައި 2012 ގައި މަރާލާފައިވާ ފުލުހެކެވެ.
އިމާރާތް ރަސްމީކޮށް ހުޅުއްވައިދެއްވީ ހޯމް މިނިސްޓަރު އިމްރާން އަބްދުﷲ އާއި ކޮމިޝަނާ އޮފް ޕޮލިސް މުހައްމަދު ހަމީދު އެވެ. މި ރަސްމިއްޔާތުގައި ފުލުހުންގެ ސީނިއަ އެގްޒެކެޓިވް އޮފިސަރުންނާއި މަރުހޫމް ސާޖަންޓް އާދަމް ހަލީމްގެ މަންމައާއި ބައްޕައާއި އަނބިކަނބަލުން އަދި ދަރިފުޅުގެ އިތުރުން އާއިލާގެ އެހެނިހެން މެމްބަރުންނާއި ފުލުހުންގެ ކޮމިޝަންޑް އޮފިސަރުންނާއި ފުލުހުންވެސް ބައިވެރިވި އެވެ.
ހެންވޭރު ދަނޑު ކައިރީގައި 10 ބުރިއަށް ހަދާފައިވާ މި އިމާރާތް ހާއްސަކޮށްފައިވަނީ ފުލުހުންގެ އިންވެސްޓިގޭޝަން ޑިޕާޓްމަންޓުތަކުގެ މަސައްކަތްތަކަށެވެ.
މި އިމާރާތުގައި އިންޓަވިއު ރޫމުތަކާއި، މެސް ހޯލަކާއި، ކޮންފަރެންސް ރޫމެއްގެ އިތުރުން މަލްޓިޕާޕަސް ހޯލެއް ވެސް ހިމެނެ އެވެ.
ފުލުހުންގެ ކްރިމިނަލް އިންވެސްޓިގޭޝަންސް ކޮމާންޑުގެ ޑިޕާޓްމަންޓުތައް ކަމަށްވާ އިކޮނޮމިކް ކްރައިމް ޑިޕާޓްމަންޓް، ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓް އަދި ޑްރަގް އެންފޯސްމަންޓް ވެސް ވަނީ މި އިމާރާތަށް ބަދަލުކޮށްފަ އެވެ.
މީގެ އިތުރުން އިިންޓަޕޯލް ނެޝަނަލް ސެންޓްރަލް ބިއުރޯއާއި ހެންވޭރު ޕޮލިސްގެ މަސައްކަތްތައްވެސް މިއަދުން ފެށިގެން ހިންގާނީ މިއިމާރާތުގައެވެ.