ކުއްޔަށް ހިފާފައިވާ ބިންތަކުގެ މައުލޫމާތު، ގުޅިފަޅު އިންވެސްޓްމަންޓް ލިމިޓެޑް (ޖީއައިއެލް) އަށް އެންގުމަށް، ގުޅީ ފަޅުން ބިން ކުއްޔަށް ނެގި ފަރާތްތަކަށް އެ ކުންފުނިން އަންގައިފި އެވެ.
ޖީއައިއެލުން ކުރި އިއުލާނެއްގައި ބުނީ، ގްލޯބަލް ޕްރޮޖެކްޓްސް ޑިވެލޮޕްމެންޓް ކޮމްޕެނީ (ޖީޕީޑީ) އިން ގުޅިފަޅު ބެލެހެއްޓި މުއްދަތުގައި އެތަނުން ބިން ކުއްޔަށް ނެގި ފަރާތެއް ވާނަމަ އެކަން މިމަހުގެ 18ގެ ކުރިން އެކުންފުންޏަށް އެންގުމަށެވެ.
ގުޅިފަޅު ތަރައްގީ ކުރުމުގެ މަސައްކަތް ޖީޑީޕީ އާ ހަވާލުކުރީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ. އެ އެއްބަސްވުން ބާތިލުކުރުމަށްފަހު ގުޅި ފަޅު ތަރައްގީ ކުރުމާއި، ކުއްޔަށޤ ދިނުން ފަދަ ކަންކަން ސަރުކާރުގެ 100 ޕަސެންޓް ހިއްސާ އޮންނަ ގުޅީފަޅު އިންވެސްޓްމަންޓަށް ދިނީ މިދިޔަ ހޮނިހިރު ދުވަހު އެވެ.
ގުޅީފަޅަކީ 2010 ވަނަ އަހަރު އިންޑިއާގެ ގްލޯބަލް ޕްރޮޖެކްޓްސް ޑިވެލޮޕްމަންޓް (ޖީޑީޕީ) ކުންފުންޏާއި ހަވާލުކޮށްގެން ހިއްކައިގެން މީހުން ދިރުއުޅުމަށް ތަރައްގީ ކުރަމުން އައި ރަށެކެވެ. އެހެން ނަމަވެސް މިހާ ދުވަސްވީ އިރުވެސް އެރަށް ތަރައްގީ ނުކުރެވޭތީ، މި ސަރުކާރުން ނިންމީ ޖީޑީޕީގެ އަތުން އެ ރަށް ނަގައި އިތުރަށް ތަރައްގީ ކުރުމަށް ގުޅީފަޅު އިންވެސްޓްމަންޓާ ހަވާލު ކުރާށެވެ. އަދި ސަރުކާރުން ނިންމާފައި ވަނީ ލައިޓް އިންޑަސްޓްރީތަކެއް އެ ރަށުގައި ތަރައްގީ ކުރުމަށެވެ.
