ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު އަދި ދީނީ އިލްމުވެރިޔާ ޑރ. އަފްރާޝީމް އަލީ މަރާލި ކަމުގެ ކުށް ސާބިތުވެފައިވާ ހ. ލޮބީ ހުސައިން ހުމާމް މެރުމަށް ސުޕްރީމް ކޯޓުން ކޮށްފައިވާ ހުކުމް ރިވިއުކުރުމަށް ހުމާމް ހުށަހެޅި މައްސަލަ ބަލައިނުގަތުމަށް ސުޕްރީމް ކޯޓުން ނިންމައިފި އެވެ.
ހުމާމުގެ ފަރާތުން މިމައްސަލަ ސުޕްރީމް ކޯޓަށް ހުށަހެޅީ މިއަހަރުގެ އޭޕްރީް މަހުގެ ތެރޭގަ އެވެ. މިމައްސަލަ ބަލައިނުގަތުމަށް ރަޖިސްޓްރާ ނިންމެވީ ނިމިދިޔަ ހަފްތާގެ ތެރޭގައެވެ.
ސުޕްރީމް ކޯޓުން ކުރާ ހުކުމްތައް ރިވިއުކުރުމުގެ އުސޫލެއް ހަދާފައިވީ ނަމަވެސް ސުޕްރީމް ކޯޓުން މިހާތަނަށް ރިވިއުކުރީ ވަރަށް މަދު މައްސަލަ އެކެވެ.
ހުމާމަށް ކުރި ދައުވާގެ ހައިލައިޓްސް
- 10 ޖެނުއަރީ 2013: އަފްރާޝީމް އަވަހާރަކޮށްލިކަމުގެ ދައުވާ ހުމާމަށް ކުރި
- 20 ޖެނުއަރީ 2013: ހުމާމް ދައުވާއަށް އިންކާރުކުރި
- 22 މެއި 2013: އަފްރާޝީމް އަވަހާރަކޮށްލި ކަމަށް ހުމާމް އިއުތިރާފުވި
- 22 މެއި 2013: ވަކީލަކު ބޭނުންނުވާ ކަަމަށް ބުނި
- އެކަމަކު ފަހުން ވަކީލަކު އައްޔަންކޮށް އަނެއްކާވެސް ދައުވާއަށް އިންކާރު ކުރި
- 21 ނޮވެމްބަރު 2013: ހެކިބަސް ނަގައި ފަހު އަޑުއެހުން ބޭއްވި
- 16 ޖެނުއަރީ 2014: ހުމާމް މަރަން ކްރިމިނަލް ކޯޓުން ހުކުމް ކުރި
- 21 އޮކްޓޫބަރު 2014: ހައިކޯޓުގައި އިސްތިއުނާފު ފެށި
- ހައިކޯޓުގައި އަފްރާޝީމް އަވަހާރަކޮށް ނުލާ ކަމަށް ހުމާމް ބުނި
- 7 ސެޕްޓެމްބަރު 2015: ހުމާމް މަރަން ކުރި ހުކުމަށް ހައިކޯޓުން ތާއީދު ކުރި
- 24 ޖޫން 2016: ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުން ހުމާމް މެރުމަށް ހުކުމްކުރި
އަނިޔާވެރި ގޮތަކަށް އަފްރާޝީމް އަވަހާރަކޮށްލީ އޮކްޓޫބަރު 1، 2012 ވަނަ ދުވަހުގެ ރޭ ޓީވީއެމްގެ ދީނީ ޕްރޮގްރާމެއްގައި ބައިވެރިވެވަޑައިގަތުމަށްފަހު އޭނާ އޭރު ދިރިއުޅުއްވަމުން ގެންދެވި ހ. ފުންވިލުގެއަށް ވަދެވަޑައިގަންނަވަނިކޮށް ތޫނު އެއްޗަކުން ހަމަލާ ދީގެންނެވެ.
އަފްރާޝީމްގެ މަރުގެ މައްސަލައިގައި ހުމާމުގެ އިތުރުން އެހެން މީހެއްގެ މައްޗަށް ވެސް ދައުލަތުން ދައުވާ ކުރި އެވެ. ނަމަވެސް އޭނާގެ މައްޗަށް ކުށް ސާބިތު ނުވާ ކަމަށް ކޯޓުން ހުކުމްކުރުމުން އޭނާ ވަނީ ދޫކޮށްލާފަ އެވެ.