އަންނަ ރިޔާސީ އިންތިހާބުގައި ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހަށް ތާއިދުކުރަން ނިންމާ އެމަނިކުފާނުގެ ރަނިން މޭޓު، ހިތަދޫ އުތުރު ދާއިރާގެ މެންބަރު މުހައްމަދު އަސްލަމަށް ކުރީގެ ބަންޑާރަ ނައިބު ދިޔާނާ ސައީދު ތައުރީފު ކުރައްވައިފި އެވެ.
މާލޭގައި ދިރިއުޅޭ ރައްޔިތުންނަށް ރޭ އަސްލަމް ބޭއްވި ބައްދަލުވުމުގައި ދިޔާނާ ވިދާޅުވީ އަސްލަމަކީ އައްޑޫއަށް ހިދުމަތްތެރި ބޭފުޅެއް ކަމަށާއި އައްޑޫއަށް އަސްލަމަށްވުރެ ބޮޑަށް ހެޔޮއެދޭ ބޭފުޅަކު ނުހޯދޭނެ ކަމަށެވެ.
"އައްޑޫ ފަސްގަނޑުން ނުވަތަ މި ރާއްޖޭގެ ފަސްގަނޑުންވެސް ނުހޯދޭނެ އައްޑުއަށް އަސްލަމަށްވުރެ ވަކި ބޮޑަށް ހެޔޮއެދޭ ބޭފުޅެއް،" ދިޔާނާ ވިދާޅުވި އެވެ.
ރައްޔިތުންގެ މަޖިލީހުގައި ހަތަރު ވަނަ ދައުރު ފުރިހަމަ ކުރައްވާ އަސްލަމް އައްޑޫގެ ތައުލީމީ ދާއިރާއަށް ގިނަ ހިދުމަތްތަކެއް ކުރެއްވިކަން ދިޔާނާ ފާހަގަކުރެއްވި އެވެ.
ރައީސް ސޯލިހަށް ދިޔާނާ ތާއީދުކުރައްވާފައިމިވަނީ ފާއިތުވި ދުވަސްތަކުގައި ރައީސް ސޯލިހަށް ފާޑު ވިދާޅުވެ ވާހަކަ ދެއްކެވުމަށްފަހު އެވެ.
