އަސާސީ ހިދުމަތްތައް ގާއިމުކުރަން މިސަރުކާރުން ކުރާ މަސައްކަތްތަކާ ގުޅިގެން ރައްޔިތުންގެ ވިސްނުން ސަރުކާރާ އެއްކޮޅަށް ބަދަލުވެގެންދާނެ ކަމަށް ރައީސް އިބްރާހިމް މުހައްމަދު ސޯލިހް ވިދާޅިވެއްޖެ އެވެ.
ބ. ކިހާދޫގައި މިއަދު އޮތް ކެމްޕޭން ޖަލްސާގައި ރައީސް ސޯލިހް ވިދާޅުވީ ގައުމަށް މިއަދު ގެންނަ ބޮޑެތި ބަދަލުތަކާއި އެކު ރައްޔިތުންގެ ވިސްނުން ބޮޑު ތަނުން ބަދަލުވާނެ ކަމަށާއި އެހެން ސަރުކާރުތަކާއި ހިލާފަށް ރައްޔިތުންގެ ހުރި ކަންބޮޑުވުންތައް މިސަރުކާރުން މާބޮޑަށްވެސް އަޑުއަހައިފި ކަމަށެވެ.
ރައީސް ވިދާޅުވީ ކުރީގެ ސަރުކާރު ތަކުގައި އަބާދީއަށް ބަލައިގެން ކަންކަން ކޮށްދިން ނަމަވެސް އެއީ އެމަނިކުފާނު ގަބޫލުކުރައްވާ އުސޫލެއް ނޫން ކަމަށެވެ.
"ވަކި ރަށެއް ތަފާތު ނުކޮށް މުޅި ގައުމަށް ތަރައްގީ ގެންނަވާނެ ވާހަކަ އަޅުގަނޑުމެން ތަކުރާރުކޮށް މިދައްކަނީ. ހިދުމަތްތައް ގާއިމު ނުވެ ހުރުމުގެ ސަބަބުން ރާއްޖެ އަށް އޭގެ ޒާތުގައި ލިބެން ޖެހޭ މިންވަރަށް ނަފާ ނުލިބި މިވަނީ،" ރައީސް ވިދާޅުވި އެވެ.
އެމަނިކުފާނު ވިދާޅުވީ ވޭތުވެ ދިޔަ ސަރުކާރު ތަކުން ރަށްތަކަށް ވަރަށް ބޮޑަށް އިހުމާލު ވެފައިވާ ކަމަށާއި، ރައްޔިތުންނަށް އެ ސަރުކާރުތަކުގައި ވީވައުދުތައް ވެސް ފުއްދައިދީފައި ނުވާ ކަމަށެވެ. ނަމަވެސް މިސަރުކާރުގައި އެންމެ އިސްކަން ދިނީ ރައްޔިތުންގެ އަސާސީ ހިދުމަތްތައް ގާއިމުކުރުމަށް ކަމުގައިވެސް ވިދާޅުވި އެވެ.
ރައީސް ވިދާޅުވީ ވޯޓަކީ ރައްޔިތުންގެ އެއްޗެއް ކަމަށާއި، ކޮންމެ ވޯޓަކީ ވެސް ބަދަލެއް ގެންނާނެ ވޯޓެއް ކަމަށެވެ. އަދި މި ސަރުކާރާ މެދު ރައްޔިތުންގެ މާބޮޑެތި ކަންބޮޑުވުންތަކެއް ނެތް ކަމުގައިވެސް ވިދާޅުވި އެވެ.
ކިހާދޫ ރައްޔިތުންނާ މުހާތަބު ކުރައްވާ ރައީސް ވިދާޅުވީ ކިހާދޫގައި ގާތްގަނޑަކަށް މިހާރު ނިމިފައިވާ ބަނދަރަކީ ސަރުކާރަކުން އެ ރަށުގައި އެޅި ފުރަތަމަ ބަނދަރު ކަމަށެވެ. ކިހާދޫ ބަނދަރާ ގުޅުވައި ރައީސް ވަނީ ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ފާޑުވިދާޅުވެފަ އެވެ. އެގޮތުން މިދިޔަ ސަރުކާރުގައި މުއިއްޒު ހައުސިން މިނިސްޓަރަކަށް ހުންނެވި ދުވަސްވަރު ކިހާދޫގައި ބަނދަރެއް އަޅައިދިނުމަށް އެދި އެރަށު ކައުންސިލުން ބައްދަލުކުރުމުން 400 މީހުންގެ އާބާދީ އޮންނަ ރަށެއްގައި ބަނދަރެއް އެޅުމުގެ ބޭނުމެއް ނެތް ކަމަށް މުއިއްޒު ވިދާޅުވި ކަމަށް ރައީސްގެ ވާހަކަފުޅުގައި ފާހަގަކުރެއްވި އެވެ.
"ވައުދުވެ، ވައުދުތައް ފުއްދަމުން މިދަނީ، އަދިވެސް ތަރައްގީ ގެންނާނަން" ވަކި ރަށެއް ތަފާތުނުކޮށް ވައުދު ފުއްދަވަމުން ގެންދަވާ ކަން ޔަގީންކޮށްދެއްވަމުން ރައީސް ވިދާޅުވި އެވެ.
ރިޔާސީ ދެވަނަ ދައުރެއް ލިބިވަޑައިގެންފިނަމަ ކިހާދޫ ސިއްހީ މަރުކަޒުގެ ހިދުމަތް 16 ގަޑިއިރުން 24 ގަޑިއިރަށް ބަދަލުކޮށް ކިހާދޫ ސްކޫލުގައި މަލްޓި ޕާޕޯސް ހޯލަކާއި ސައިންސް ލެބެއް ގާއިމުކޮށްދޭނެ ކަމަށެވެ. ކިހާދޫ ފަޅު ފުން ކުރުމަށް ފަހު ސްވިމިން ޓްރެކެއް އަޅައި ދެއްވާނެ ކަމަށާއި އަދި ރަށުގެ އިންޖީނުގެ އެހެން ސަރަހައްދަކަށް ބަދަލުކޮށް ކަރަންޓުގެ ހިދުމަތުގެ ފެންވަރު ރަނގަޅުކޮށްދެއްވާނެ ކަމުގައިވެސް ވިދާޅުވި އެވެ. ކިހާދޫގައި އޭޓީއެމް މެޝިނެއް ބަހައްޓައިދީ، ރަށުގެ ފުޓްސަލް ދަނޑު ބޮޑު ކޮށްދެއްވާނެ ކަމުގައިވެސް ވިދާޅުވި އެވެ.