އެމްޑީޕީއާ އަލުން ގުޅުނީ ރައްޔިތުންގެ ވިންދާ އެއްގޮތަށް ކަމަށް ތޮއްޑޫ ދާއިރާގެ މަޖިލިސް މެންބަރު ހަސަން ޝިޔާން ވިދާޅުވެއްޖެ އެވެ.
އެމްޑީޕީއަށް އަލުން ސޮއިކުރެއްވުމަށްފަހު ޝިޔާން ވިދާޅުވީ ދާއިރާ އާއި މުޅި ރާއްޖޭގެ ގިނަ ރައްޔިތުންގެ ވިންދާ އެއްގޮތަށް ވިސްނުން ބަދަލުކޮށްފައިވާ ކަމަށެވެ.
"އިންޝާ ﷲ ތޮއްޑޫ ދާއިރާގެ ސާފު ބޮޑު އަގުލަބިއްޔަތާއެކު ރައީސް އިބްރާހީމް މުހައްމަދު ސޯލިހު މި އިންތިހާބު އެއްބުރުން ކާމިޔާބު ކުރައްވާނެ،" ޝިޔާން އިތުރަށް ވިދާޅުވި އެވެ.
އެމްޑީޕީގެ ތެރޭގައި އުފެދުނު ހިޔާލުތަފާތުވުންތަކަށްފަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދާއެކު ޝިޔާން މަސައްކަތް ކުރެއްވި އެވެ. މީގެ އިތުރުން ދަ ޑިމޮކްރެޓްސް އުފެއްދުމާ ގުޅިގެން އެޕާޓީއަށް އެންމެ ފުރަތަމަ ސޮއި ކުރެއްވި މެންބަރުންގެ ތެރޭގައިވެސް އޭނާ ހިމެނެ އެވެ.
މެންބަރު ޝިޔާން އެމްޑީޕީއަށް ސޮއިކުރެއްވުމަށްފަހު ރޭ ވަނީ އޭނާގެ މެންބަޝިޕް ފޯމު ރައީސް ސޯލިހާ ހަވާލުކުރައްވާފަ އެވެ.
އެމްޑީޕީގައި ހުންނެވުމަށްފަހު ދަ ޑިމޮކްރެޓްސްއަށް ސޮއިކުރެއްވި ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުއްލަތީފާއި ކުޅުދުއްފުށި މޭޔަރު މުހައްމަދު އާތިފް މިދިޔަ ހަފްތާ ވަނީ އަލުން އެމްޑީޕީއާ ގުޅިވަޑައިގެންފަ އެވެ.