ގައުމުތަކުން ދިރުންތަކުގެ ސަލާމަތްތެރިކަމަށް މަސައްކަތްކުރާ މިންވަރު ބެލުމަށް ކޮންމެ އަހަރަކު ތައްޔާރުކުރާ "ބައޯ ސޭފްޓީ ރިޕޯޓް"އާ ބެހޭ މަސައްކަތު ބައްދަލުވުމެއް ބާއްވައިފި އެވެ. ބައްދަލުވުން ބޭއްވީ މިއަދު އެންވަޔަރަމަންޓް މިނިސްޓްރީގަ އެވެ.
ބައޯސޭފްޓީ ބައްދަލުވުމަކީ، ދިރޭތަކެތި ރައްކާތެރިކޮށް، ހުރިހާ ދިރުންތަކަކަށް ރައްކާތެރި މާހައުލެއް ގާއިމްކޮށް، ދިރޭތަކެތި އިމްޕޯޓްކުރުމާއި އެކްސްޕޯޓްކުރުމުގައި ރައްކާތެރި ގޮތްތައް ބޭނުންކުރުމަށް އެކުލަވާލާފައިވާ "ކާޓަހޭނާ ޕްރޮޓޮކޯލް އޮން ބަޔޯސޭފްޓީ ޓު ދަ ކޮންވެންޝަން އޮން ބަޔޮލޮޖިކަލް ޑައިވަސިޓީ" ގެ ދަށުން މެންބަރު ގައުމުތަކުގައި ބާއްވާ ބައްދަލުވުމެކެވެ.
އެންވަޔަރަމަންޓް މިނިސްޓަރު ތޯރިގް އިބްރާހިމްވެސް ބައިވެރިވެވަޑައިގެންނެވި އެ ބައްދަލުވުމުގައި ބަޔޯސޭފްޓީ ދާއިރާ މިހާރަށްވުރެ ހަރުދަނާ ކުރުމަށް ކުރެވިދާނެ މަސައްކަތްތަކާ ބެހޭގޮތުން މަޝްވަރާކޮށްފައިވާ ކަމަށް އެންވަޔަރަމަންޓް މިނިސްޓްރީން ބުންޏެވެ.
ބައޯސޭފްޓީއާ ބެހޭ ބައިނަލްއަގުވާމީ މުއހަދާގައި ރާއްޖެއިން ބައިވެރިވީ 2003 ވަނަ އަހަރު އެވެ.
