ކުރީގެ އޮޑިޓާ ޖެނަރަލް އިބްރާހީމް ނިޔާޒަށް ބަޔަކު މަގުމަތިން ދިމާކޮށް ފުރައްސާރަކޮށްފި އެވެ.
ނިޔާޒު ވަނީ ސޯޝަލްމީޑިއާގައި އޭނާއަށް ފުރައްސާރަ ކުރި މީހާގެ ފޮޓޯ އާންމުކޮށްފަ އެވެ.
ނިޔާޒު ވިދާޅުވި ގޮތުގައި އެ މީހާ މަގުމަތިން އޭނާއާއި ފުރައްސާރަކޮށް އިންޒާރު ދިނީ ހިދުމަތެއް ހޯދުމަށް ބޭންކަށް ދިޔަ މަގުމަތީގަ އެވެ. އަދި އެއީ އިދިކޮޅު ޕީޕީއެމް މީހެއް ކަމަށް ތުހުމަތުކޮށްފައިވެ އެވެ.
"މިހާރުއްސުރެ ޕީޕީއެމްގެ އަސްލު ސިފަ މިދަނީ ފެންނަމުން. ވެރިކަން ލިބިއްޖިއްޔާ ކަންތައްތައް ހުންނާނެ ގޮތް އަންދާޒާ ކޮށްލައްވާ،" ނިޔާޒު ވިދާޅުވި އެވެ.
ނިޔާޒަށް ފުރައްސާރަ ކުރި ކަމަށް ބުނާ މީހާވެސް ފަހުން ވަނީ ނިޔާޒަށް ފުރައްސާރަ ކުރާ ވީޑިއޯއެއް ޓްވިޓާގައި އާންމުކޮށްފަ އެވެ. މި ވީޑިއޯ އިން ފެންނަ ގޮތުގައި އެ މީހާ ގެންދަނީ މަގުމަތިން ނިޔާޒު ފެނުމާ އެކު ފަހަތުން ގޮސް، ނިޔާޒު ބޭންކަށް ވަނުމާ ހަމައަށް ދިމާކޮށް ފުރައްސާރަ ކުރަމުންނެވެ.
ދިވެހި ތާރީހުގައި ހިންގި އެންމެ ބޮޑު ހިޔާނާތް ޕީޕީއެމްގެ ފުރަތަމަ ސަރުކާރުގައި ހިންގި ދުވަސްވަރު އޮޑިޓާ ޖެނަރަލްގެ މަގާމުގައި ހުންނަވައިގެން ނިޔާޒު ވަނީ އެ ހިޔާނާތުގެ އޮޑިޓް ރިޕޯޓް އާންމުކުރައްވާފަ އެވެ. އޭގެފަހުން ޕީޕީއެމް އިން ކޮންޓްރޯލް ކުރަމުން ދިޔަ މަޖިލީހަކުން ވަނީ އާ އޮޑިޓާ ޖެނަރަލަކު އައްޔަންކުރަން ޖެހޭ ގޮތަށް އޮޑިޓް ގާނޫނު އިސްލާހުކޮށް ކުއްލި ގޮތަކަށް ނިޔާޒަށް މަގާމު ގެއްލުވާލާފަ އެވެ. އޭރު އެ އިސްލާހު ގެންނަން އުޅުމުން ނިޔާޒު ވަނީ އެކަން ހުއްޓުވުމުގެ އަމުރަކަށް އެދި ސިވިލް ކޯޓަށް މައްސަލަ ވެސް ހުށަހަޅުއްވާފަ އެވެ. އެހެންނަމަވެސް ސިވިލް ކޯޓުން ވަނީ އެ އަމުރު ނެރެދެވެން ނެތް ކަމަށް ކަނޑައަޅާފަ އެވެ.